Тимофеева Дария Федоровна

(1921-1981)

          I Тыыллыма нэһилиэгэр Быысаһыл диэн сиргэ дьадаҥы элбэх оҕолоох ыалга төрөөбүтэ.

       Даайа уонна эдьиийэ Катя аҕалара Федор Тимофеевич, ийэтэ Анастасия Яковлевна (бэйэлэрин 6 оҕолорун таһынан өссө 2 тулаайах) 8 оҕону иитэн, көрөн-харайан улаатыннартаан, олох суолугар үктэннэрбиттэрэ. Анастасия олорон (1979 с.) 95 сааһыгар өлбүтэ. Кыыһа 1931с. Аһыыкай оскуолатыгар киирбитэ уонна Майа, I Хаптаҕай оскуолаларыгар үөрэнэн 1940с. 7-с кылааһы бүтэрбитэ.

       Дария Федоровна 1940-42сс. Ворошилов аатынан колхозка – суотчут, улахан дьону үөрэтэр оскуолаҕа учуутал этэ. Ити кэмҥэ сэриигэ барбыт киһини солбуйан дойдутугар бырабылыанньа председателинэн талыллар. Ол кэнниттэн 1943-44сс. райсобеска бухгалтердыы олорон, 1946с. сэбиэт секретарынан ; онтон 10-ча сыл оскуолаҕа суотчутунан; 1960с. диэри Сталин, кэлин Ленин аатынан колхозка бырабылыанньа секретарынан; онтон салгыы детсаакка, үлэтин суотчутунан саҕалаан баран, 1963с. сэбиэдиссэйинэн 12 сыл таһаарыылаахтык үлэлээбитэ. Биһиги детсааппыт уонна оскуолабыт базатыгар 1967-68 үөрэх дьылыттан детсад иитээччилэрин бэлэмниир педагогическай кылаас куурустарын аһар, онно икки сыл дьоннор республика араас улуустарыттан кэлэн үөрэммиттэрэ.

       Кини ити иннинэ киэһээҥҥи оскуолаҕа ситии-хотуу аттестатын ылан, үүнэр көлүөнэни бэлэмнииргэ аналлаах педагогическай үөрэхтэммитэ. Кини үлэлиир кэмигэр детсад улууска үчүгэй ахсааннарыгар бигэтик киирбитэ, оҕону уонна төрөппүттэри кытары үлэни атаҕар туруорбута, детсад материальнай базатын хаҥатыыга утумнаахтык үлэлээбитэ.

    Нэһилиэк общественнай олоҕор актыыбынайдык кыттара, ол курдук үс ыҥырыыга олохтоох биир ыҥырыыга оройуон сэбиэттэрин депутатынан, бөһүөлэккэ табаарыстыы суут, дьахтар сэбиэтин председателинэн талыллыбыта. Д.Ф.Тимофеева “1941-1945 Аҕа дойду улуу сэриитин сылларыгар килбиэннээх үлэтин иһин”, үбүлүөйүнэй В.И.Ленин төрөөбүтэ 100 сыла туолуутугар “Килбиэннээх үлэ иһин” мэдээллэринэн, Саха АССР Үрдүкү Сэбиэтин Презедиумун Бочуотунай грамотатынан наҕараадаламмыта. Тыыллыма нэһилиэгин Бочуотун кинигэтигэр киллэриллибитэ. Дария Федоровна уонна кини кэргэнэ Баишев Петр Иннокентьевич олохторун чаҕылхайдык олорон ааспыттара. Кинилэртэн 6 оҕо, элбэх сиэннэр бааллар.