Главная » 2017 » Август » 27 » "Алаас симэхтэрэ" муода устуудьуйата
11:16
"Алаас симэхтэрэ" муода устуудьуйата

«Алаас симэхтэрэ» муода устуудьуйатыгар сөбүлээн дьарыктанабын

Хас биирдии киһи туспа интэриэстээх, сөбүлүүр дьарыктаах буолар. Мин ханнык баҕар эйгэ буоллун, айар үлэнэн дьарыктанарбын сөбүлүүбүн. Ол курдук, иистэнэбин, араас оҥоһуктары айабын, бизнес-бырайыактаах буоламмыт оҕолорго тэрээһиннэри ыытабын, күрэхтэргэ визиткэ, үҥкүү туруорабын. Ол иһин, айар үлэм барыта биир сиргэ түмүлүннүн диэн, 6-с кылааска «Алаас симэхтэрэ» муода устуудьуйатыгар киирбитим. Салайааччыбыт – Соловьева Мария Сильвестровна. Муода устуудьуйатыгар биһиги таҥаһы-сабы, киэргэли, сувенирдары оҥорорго, айарга, тигэргэ үөрэнэбит. Ону таһынан, тикпит таҥаспытын бэйэбит кэтэн дьоҥҥо-сэргэҕэ хааман көрдөрөбүт.

Ханнык баҕарар оҥоһугу, таҥаһы тигэргэ дизайнын, уопсай быһыытын айартан саҕалыыгын. Өйгөр туох киирбитин кумааҕыга уруһуйдуугун, матырыйаалын талаҕын уонна дьэ тигэн бараҕын. Мин аан бастаан тирииттэн сахалыы оһуордаах-дьарҕаалаах хоҥор өҥнөөх шортиктаах көстүүмү тикпитим. Быһыытын-таһаатын бэйэм айбытым, тигиитин устуудьуйаҕа дьарыктанар кыргыттары кытта көмөлөөн тикпиппит. Учууталбыт таҥаһы киһиэхэ кээмэйдээн быһарга, иистэнэр массыынанан туттарга үөрэтэр. Устуудьуйабытыгар уопсайа сүрүн үс коллекциялаахпыт - тирииттэн авангрард, «Сахам сирэ», «Майа 115 сааһа». «Сахам сирэ» коллекциаҕа таҥастарыгар төрөөбүт дойдубут бэлиэ сирдэрин дьүһүйдүбүт – Өлүөнэ очуостара, ыһыах, сир аһа, «Майа 115 сааһа» - былаачыйаларга, болотуналарга Майа историятын акрил кыраасканан уруһуйдаабыппыт, Ураһалаах алааһыгар баар Аал луук Маһы, оһуохайдыы сылдьар дьону, тапталлаах Майабыт киириитигэр турар «Дойдум» барахсан диэн бэлиэни дьүһүйбүппүт. Бу коллекцияларбытынан «Бриллиантовые нотки», «Снежные узоры» норуоттар икки ардыларынааҕы фестивальга кыттыбыппыт.

Муода устуудьуйатыгар дьарыктанар буоламмыт, тикпит таҥаспытын бэйэбит кэтэн дьон-сэргэ дьүүлүгэр таһаарабыт. Онуоха, салайааччыбыт сыанаҕа таҥаһы көрдөрүү хаамыытыгар туспа үөрэтэр. Ол курдук, хайаан да төбөҕүн, сискин көнөтүк тутта сылдьыахтааххын. Оттон илиигин хайдах туттан тахсарыҥ таҥаскыттан тутулуктаах. Холобура, сиэххэр араас салыбырастардаах эбэтэр кынат курдук танастаах буоллаххына көнөтүк үөһээ туттаҕын, оттон туга да суох буоллаххына – өттүккэр тутаҕын. Соҕотох, иккилии-үстүү буолан сыананы иккитэ-үстэ эргийэҕин. Көрөөччү мадьыал таҥаһын инниттэн-кэнниттэн толору көрүөхтээх, ол иһин араас өттүттэн эргийэн көрдөрөҕүн. Онон, муода көрдөрүү – туспа үҥкүү курдук уратылардаах, хамсаныылардаах.

Маны сэргэ устуудьуйабытыгар бүрүчүөскэ оҥорорго, киһи этигэр-сиинигэр, сирэйигэр боди-арт уруһуйдуурга үөрэнэбит.

.

Наташа Егорова, 9 «б» кылаас үөрэнээччитэ.

Просмотров: 17 | Добавил: mayaschool | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]