Главная » 2017 » Октябрь » 17 » Дьо5ур
21:27
Дьо5ур

Уруһуйдуурбун сөбүлүүбүн

Бүгүн биһиги куруһуокпутугар кырачаан уруһуйдьут Саша Иванов ыалдьыттаата. Кини В.П. Ларионов аатынан Майа орто оскуолатыгар 3 «б» кылааска үөрэнэр, учуутала – Дария Петрова. Саша өссө 2-с кылааска үөрэнэ сылдьан улуустааҕы оҕо библиотекатыгар ааптарскай быыстапкатын оҥорон турар, улуустааҕы уруһуй күрэхтэрин лауреата, дипломана. Кырачаан уол уруһуйдуурун 4 сааһыттан саҕалаабыт. Бастакы хартыыната – уот остуолбалара. Бу хартыынаны тимир ууһа үрдүктүк сыаналаан уолу улааттаҕына үчүгэй худуоһунньук буолсу диэн хомус бэлэхтээбит. Саша сөбүлүүр дьарыгын туһунан бу курдук кэпсиир.

  • Бастакы хартыынабын уруһуйдуурбар массыынанан айаннаан иһэн уот остуолбалара кыччаан-улаатан көстөллөрүн дьиибэргии көрбүтүм. Бу уруһуйга остуолбалар айаннаан иһэн чугаһаатах аайы – улаатан, ырааттахха – кыччаан иһэр быһыыларын көрдөрбүтүм. Ону кырдьаҕас тимир ууһа кээмэйдэрин таба уруһуйдаабыккын диэн хайгаабытыттан олус үөрбүтүм. Бу – 4 саастаахпар этэ.

Саша ордук тугу сөбүлээн уруһуйдуугунуй?

  • Ийэм Любовь биология учуутала. Ол иһин миэхэ өрүү көтөрдөр, кыыллар тустарынан кэпсиир. Бэйэм кыра сааспыттан кинигэни сөбүлээн ааҕабын. Дьиэбэр 46 энциклопедиялаахпын. Баҕар ол иһин буолуо, араас көтөрдөрү, айылҕаны сөбүлээн уруһуйдуубун. Саамай сөбүлүүр көтөрүм – хотой. Дьиэбэр попугайдаахпын, улиткалардаахпын уонна куоскалаахпын.

Уруһуйдуурга ким үөрэппитэй? Ханнык матырыйааллары туттаҕыный?

- Кыра эрдэхпинэ ийэм үөрэтэрэ. Оскуолаҕа уруһуй учуутала – Лука Кимович. Ааспыт сылга оҕону эбии үөрэхтээһин киинигэр Валерия Судико салайааччылаах уруһуй куруһуогар дьарыктаммытым. Кини миигин батиктыырга (таҥаска уруһуйдуурга) үөрэппитэ. Уруһуйдуурбар харандаас, акварель, гуаш туһанабын. Инникитин маслянай кыраасканан уруһуйдуохпун баҕарабын. Ханнык баҕарар хартыынаны уруһуйдуурга бастаан боростуой харандааһынан эскиз түһэрэбин, туох ханан туруохтааҕын, көтөр буоллаҕына – төбүтүн, кынатын кээмэйэ төһө буолуон сөбүн кругтары уруһуйдаан былаанныыбын. Онтон боростуой харандааһынан уруһуйдаан баран, өҥүн табан кырааскалыыбын.

Уруһуйдуургар хайдах-туох иэйии киирэрий?

  • Мин кинигэҕэ, араас хартыыналарга,телеперадачаларга кыыллары олус таптыы, сөбүлүү көрөбүн. Көтөрдөр быыкайкаан түү мээчик курдук оҕолорун атаахтатыахпын баҕарабын. Ол иһин кинилэри уруһуйдуурбуттан улахан дуоһуйуу ылабын уонна үөрэбин. Уруһуй киһини болҕомтолоох, тулуурдаах буоларга, толкуйдуурга үөрэтэр дии саныыбын.

Уруһуйдууруҥ таһынан тугунан дьарыктанаҕыный?

  • Араас матырыйааллартан кинигэ оҥоробун. Холобур, өҥнөөх кумаахыны, пластилины, баайы саптарын туһанан молюскалар, осьминогтар, кальмардар тустарынан кинигэ оҥорбутум. Интэрниэттэн оригами ньыматынан көтөрдөрү оҥорорго холонобун. Маны сэргэ оскуолабар чинчийэр үлэнэн дьарыктанабын. «Ветряная электростанция» үлэбинэн республикатааҕы ааҕыыга I миэстэ, «Манньыат харчыттан уоту ылыы» үлэбинэн В.П. Ларионов ааҕыыларыгар II миэстэ буолбутум.

Инникитин туох былааннааххыный?

  • Быйыл Майатааҕы художественнай оскуолаҕа киирдим. Онон уруһуйдуур дьоҕурбун сайыннараммын улааттахпына худуоһунньук буолуохпун баҕарабын. Өссө биир баҕа санаам – Саха сиригэр хотойдор пааркаларын арыйан үлэлэтии буолар.

Оҕолоор, эһиги эмиэ Саша курдук сөбүлүүр дьарыккытын утумнаахтык сайыннардаххытына, ситиһиилээх буолуоххут. Саша айар үлэтин аартыга, аһылла, тупса-сайда турарыгар баҕарабыт!

Лена Сидорова, 9 «а» кылаас «Мэҥэбил» эдкорпост.

Просмотров: 32 | Добавил: mayaschool | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]