Главная » 2016 » Декабрь » 5 » "Эргиэн улуустааҕы бизнес-оонньуу"
21:15
"Эргиэн улуустааҕы бизнес-оонньуу"

«Эргиэн» бизнес -оонньуу

Аныгы сайдыылаах олох тэтиминэн, Дойдубут, Республикабыт, уопсастыбабыт олоҕун таһымын үрдэтиигэ биир сүрүн миэстэни урбаан (предпринимательство) ылар. Билиҥҥи олох ирдэбилинэн, күннэтэ араас эйгэҕэ үлэлиир урбаанньыт элбээн иһэр. Уопсастыба, салалта өттүттэн нэһилиэнньэ дьарыктаах буолуутун өйүүр анал программалар үлэлииллэр,  араас күрэхтэр ыытыллаллар. Онуоха, В.П. Ларионов аатынан Майа орто оскуолата кэнчээри ыччаты урбаан эйгэтигэр таһаарыылаах үлэһит буолар ыччаты иитигэ ситимнээх үлэни ыытар. Ситиһиилээх личноһы иитэн таһаарыыга оскуолаҕа бизнес-инкубатор үлэлиир, сыл устата оҕолор предпримательство оҥкулун үөрэтэр чаастарга дьарыктаналлар. Урбаан сатабылын иҥэрэр  тэрээһиннэр, күрэхтэр ыытыллаллар.  Ахсынньы 2 күнүгэр В.П. Ларионов аатынан Майа орто оскуолатыгар оскуола оҕолоругар аналлаах «Эргиэн» улуустааҕы бизнес-онньуу ыытылынна. Күрэххэ уопсайа биэс оскуолаттан уоннуу оҕолоох алта хамаанда кытынна. (В.П. Ларионов аатынан Майа, Табаҕа, Хаптаҕай, Мэлдьэхси, Төҥүлү, Тыыллыма орто оскуолалара). Тэрээһини В.П. Ларионов аатынан Майа орто оскуолатын дириэктэрэ Игнатеьева Светлана Кимовна, диэриэктэри иитэр үлэҕэ солбуйааччы Абрамова Варвара Гаврильевна, «СМиД» оҕо тэрилтэтин салайааччыта Рязанская Алена Федотовна уонна «Эргиэн» бырайыак салайааччыта, финансовай-экономическай колледж преподавателя, тус урбаанньыт Посельскай Семен Семенович иилээн-саҕалаан, тэрийэн ыыттылар.  Күрэх сыалынан-соругунан оҕолору урбаан эйгэтигэр сыһыарыы, олоҕу кытта тэҥҥэ хардыылыыр киэҥ көрүүлээх ыччаты иитэн таһаарыы буолар. Хамаандалар талбыт тиэмэлэригэр бизнес-бырайыак айан-тутан оҥорон таһаарыыга уонна ону көмүскээһиҥҥэ, сырдатыыга күрэхтэстилэр. Тэрээһин түмүгүнэн, кыайыылааҕынан «Флористик» бырайыак, В.П. Ларионов аатынан Майа орто оскуолатын 2-с хамаандата буолла,  II м – «Туризм» бырайыак, Хаптаҕай орто оскуолата, III м – «Изготовление якутского шоколада» бырайыак, В.П. Ларионов аатынан Майа орто оскуолатын 1-кы хамаандата.

Семен Семенович Посельскай:

  • «Эргиэн» оонньуу аныгы үйэ сайдыылаах оҕотоун бизнес эйгэтигэр сыһыарар, үөрэтэр аналлаах, оҕо урбаанньыт буола улаатарыгар сөптөөх хайысханы ыйан-кэрдэн, сүбэлээн-амалаан биэрэбит. Онньуу 2013 сыллаахха Айыы кыһатын орто оскуолатыгар аан бастакынан тэриллэн ыытыллыбыта. Онуоха дириэктэр Шамаева Лидия Петровна көмөтө, сүбэтэ-амата олус улахан суолталаах. Кини айыан-тутуон баҕалаах төрөппүттэри түмэн икки сыл устата үлэлэппитэ. Ол түмүгэр, оҕолорбут бэйэлэрэ бизнес-дьаарбаҥка оҥорон үлэлэрин атыыга таһаарбыттара. Онтон кынаттанаммыт, быйыл сайын педагогическай дьаарбаҥкаҕа кыттарга санаммыппыт. Онно ИРОиПК үлэһиттэрэ таба көрөннөр,  бырайыак олоххо киириитин өйөөбүттэрэ. Билиҥҥи туругунан, сэттэ улууска сырыттыбыт: Горнай, Чурапчы, Уус-Алдан, Таатта, Алдан, Нам, Мэҥэ-Хаҥалас. «Эргиэн» бизнес-оонньуу финала  кулун тутар 5 күнүгэр Дьокуускайга буолуоҕа.

Баишев Максим, Төҥүлү орто оскуолатын 10 кылааһын үөрэнээччитэ.

  • Бу тэрээһин биһиэхэ инники олохпутугар туһалыа дии саныыбын. Холобура, үөрэххэ киирбэт да түгэҥҥэ бизнес, үлэ тэринэн олоххо тус миэстэҕин булунан сылдьыахха сөп.  Биһиги оскуолабыт оҕолоро бизнес эйгэтигэр үлэлэһэллэр. Күһүнүн букет оҥорон атыылыллар, кыһынын иистэнэллэр. Ол курдук, тус предприниматель  Шелканова Аня иистэнэр, оҥоһуктарын атыылыыр.

Никифорова Констанция, Хаптаҕай орто оскуолатын 11 кылааһын үөрэнээччитэ.

  • Билиҥҥи оҕолор олус сайдыылаахтар, олохпут да түргэн тэтимнээх. Онон маннык хабааннаах тэрээһиннэринэн оҕолору предпринимательствоҕа сыһыараллара олус туһалаах, инники олохторугар көмө, тирэх буолар дии саныыбын. Аныгы оҕо эргиччи сатабыллаах, туохтан да иҥнэн-толлон турбат буоларга үөрэниэхтээх..

Бурнашев Алеша, Табаҕа орто оскуолатын 10 кылааһын үөрэнээччитэ:

  • Бизнес-оонньуу харчыныан сатаан туһанарга, толкуйдуурга, ырытарга үөрэтэр.  Онон маннык тэрээһини инникитин өссө да сайыннарыахха наада эбит. Биһи оскуолабытыгар продавец, экономика дисциплиналарыгар үөрэтэллэр.  Уолаттар маһынан оҥорон атыылыллар. Мин тус бэйэм интернет маҕаһыынтан оҕолорго наадалаах табаары сакаастаан атыылыыбан.

Яковлева Юлия, Мэлдьэхси орто оскуолатын 11 кылааһын үөрэнээччитэ.

  • Бүгүҥҥү тэрээһиҥҥэ кыттан мин олус элбэҕи биллим, бизнес-бырайыак оҥорорго үөрэнним.  Ылбыт билиим инникитин олохпор туһалыа дии саныыбын. Манна кыттан оҕолор харчынан сатаан туһанарга үөрэнэллэр.

Изабелла РОМАНОВА

 

Просмотров: 186 | Добавил: mayaschool | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]