Главная » 2017 » Январь » 9 » "Кудай бахсы" кыһыҥҥы уһуйаан
01:03
"Кудай бахсы" кыһыҥҥы уһуйаан

«Кудай Бахсы» кыһыҥҥы уһуйаан оскуолата

 

            Тыйыс айылаҕалаах саха норуотун мындыр уустара кыһыыҥҥы уһун киэһэлэргэ көмүлүөк оһох сырдыгар араас оҥоһуктары уһаналлара, оҕолорго анаан муостан, мастан оонньуурдары, кэрэ аҥардарга симэхтэри кыһаллара. Өбүгэлэрбит үтүө үгэстэрин сөргүтэн, В.П. Ларионов аатынан Майа орто оскуолатыгар кыһыҥҥы каникул кэмиҥэр «Кудай Бахсы» уһуйаан оскуолата иккис сылын таһаарыылаахтык үлэлээтэ. Уһуйааны оскуола эбии үөрэхтээһин педагога, «Тэгин» куруһуок салайааччыта Ворогушин Дорҕоон Дохсун 5-8 кылаас үөрэнээччилэригэр анаан иилээн-саҕалаан тэрийдэ. Уолаттары саха төрүт дьарыгар, сатабылыгар үөрэтэр оскуола быйыл икки хайысханан үлэлээтэ. Хомус ууһа Седалищев Иннокентий Михайлович – Уран уонна муос ууһа Кузьмин Дмитрий Юрьевич Дьокуускай куораттан анаан кэлэн 4 күн устата 15 оҕону мындыр дьарыкка үөрэттилэр, анал маастар-кылаастары ыыттылар. Кыһыҥҥы сынньалаҥнарын туһалаахтык атаарбыт үөрэнээччилэр тимири тымныылыы таптайан уһаныы ньыматын бары кистэлэҥнэригэр, тайах муоһуттан уһаныы уратытыгар үөрэннилэр.  

Уһуйаан түмүгүнэн, лааҕыр үөрэнээччилэрэ биирдии хомуһу, тайах муоһуттан көрүөхтэн кэрэ, уран көстүүлээх «Тимири уһаарыы» композицияны, кыра хопполору, харысхаллары, араас кыыллары чочуйан таһаардылар. Онуоха оҥоһуктарыгар маһы, туойу, төрүт иис матырыйаалын – тириини бары оҥоһуктарыгар таба туһанан дьон-сэргэ кэрэхсэбилин ыллылар. Хомус оҥорорго үөрэммит уолаттар лааҕыры сэргии кэлбит ыалдьыттарга бэйэлэрэ тутан-хабан оҥорбут хомустарыгар оонньоон дьүрүһүттүлэр.

Бэлиэтээх эттэххэ, «Кудай Бахсы» уһуйаан Дорҕоон Дохсун «Тэгин» бырайыагын чэрчитинэн ыытылынна.  Куруһуокка оскуола үөрэнээччилэрэ, чуолаан уолаттар, сыл устата бары өттүнэн сатабыллаах Саха Хоһууна буолан уһуйуллан тахсарга тиһиктээхтик дьарыктаналлар. Ол курдук, айымньылаах учуутал ыйдарынан арааран «Тыл Хоһууна» (тыл тыынын иҥэрии), «Сарыал хамсаныыта», «Боотур омооно» (өбүгэ оонньууларынан эти-сиини чэбдигирдии), «Дьөһөгөй оҕото» (аты айааһааһын), «Хатарыллыы» (сатыы алаастары кэрийэн үөрэтии) уонна сыл түмүгүнэн, «Үрдүгү дабайыы» (хайаны дабайыы) үөрэҕин ситимнээхтик ыытар.

Ураты дьарыкка уһуйуллубут лааҕырдарын туһунан үөрэнээччилэр тус санааларын бу курдук үөрэ-көтө үллэстэллэр:

Рудик Митрофанов, 7 «б» кылаас үөрэнээччитэ:

- Мин кыһыҥҥы лааҕырга хомуһу оҥорорго үөрэнним. Уһаныы бу көрүҥэ олус интэриэһинэй уонна уустук эбит. Тоҕо диэтэр, барытын илиинэн оҥордубут. Тимири араастаан тутан, токурутан, саайан, игиилээн, анал тэрилинэн чочуйан. Саамай уустуга тылын сөпкө олордуу буолар эбит. Хомуһу оҥорорго тулуурдаах уонна болҕомтолоох буолуохха наада. Учууталларбытыгар биэрбит билиилэрин иһин махталбын тиэрдэбин.

Макарий Скрябин, 8 «б» кылаас үөрэнээччитэ:

  • Мин бу лааҕырга дьарыктанан бэйэбэр муостан «Биэс харах» диэн харысхал оҥоһуннум. Бастаан пластилинынан эскиз оҥороҕун, онтон муоскун эрбээн уруһуйдуугун, анал станокка кыһан таһаараҕын уонна тиһэҕэр аалан килэбэчитэҕин. Муоһунан уһанан киһи дуоһуйууну ылар эбит. Учууталларбар махтанабын.

Бу курдук уран тарбахтаах өбүгэлэрбит үтүө дьарыктарын сөргүтэр айымньылаах уһуйааҥҥа үөрэнээччилэр кыһыҥҥы сынньалаҥнарын туһалаахтык, үтүө түмүктээхтик атаардылар.

Изабелла Романова.

 

Просмотров: 184 | Добавил: mayaschool | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]