Главная » 2020 » Февраль » 8 » Мероприятия, конкурсы, соревнования, посв декаде Ларионова
07:08
Мероприятия, конкурсы, соревнования, посв декаде Ларионова

В.П. Ларионов аатынан Майа орто оскуолатыгар үөрэнээччилэргэ уонна учууталларга аналлаах Бүтүн Дойду, республика, улуус таһымнаах билим-чинчийии кэмпириэнсийэлэрэ, киэҥ хабааннаах күрэхтэр, араас тэрээһиннэр нэдиэлэ устата тэтимнээхтик ыытылла тураллар.

Олунньу 5 күнүгэр улуустааҕы «Өркөн өй» хамаанданан күрэх, «Дебаты», «Робототехника» турнирдара буоллулар.

«Өркөн өй» улуустааҕы күрэххэ: Төхтүр, Ф.Г. Охлопков, В.П. Ларионов аатынан Майа, Төҥүлү, Хара, Алтан орто оскуолаларыттан уопсайа 9 хамаанда кытынна. Күрэх үөрэнээччилэр төрөөбүт Сахаларын сирин уонна Англия култуураларын, историяларын билиилэрин чиҥэтэр, толкуйдуур, сахалыы, английскайдыы саҥарар дьоҕурдарын сайыннарар сыаллаах тэрилиннэ.

Быйылгы «Өркөн өй» 6-с кылаас үөрэнээччилэригэр ананна. Хамаандалар 7 түһүмэхтээх тургутууну аастылар:

1 түһүмэх. Хамаанда бэйэтин сахалыы, английскайдыы билиһиннэриитэ.

2 түһүмэх. Блиц-ыйытыы. Саха сирэ, Англия историялара.

3түһүмэх. Саха сирин төһө билэҕиний? Сахалыы, английскайдыы эппиэт.

4түһүмэх. Тыл хонуута. Биридимиэт английскайдыы аатын этии.

5түһүмэх.Маллааххолбука. Холбукаҕа баар биридимиэти таайыы. Сахалыы, английскайдыы эппиэт.

6түһүмэх. Английскай тылы төһө билэҕиний? Английскайдыы этии оҥоруу.

7түһүмэх. Бу кимий? Хаартысканан Саха сирин, Англия чулуу дьонун таайыы. Сахалыы, английскайдыы эппиэт.

Кыайыылаахтарынан буоллулар: 1 миэстэ—Хара орто оскуолата, 2 м. В.П. Ларионов аатынан Майа орто оскуолата, 3 м. Чыамайыкы орто оскуолата.

Уустук тургутугу ааспыт хамаандалар күрэх туһунан санааларын бу курдук үллэстэллэр:

Алтан орто оскуолатын 7 кылааһын хамаандата:

Историяны билэргэ, ыйытыкка таба хоруйдуурга, саҥарарга үөрэтэр. Саамай уустук түһүмэҕинэн холбука иһигэр туох баарын таайыы буолар. Биһиэхэ «Кыыстаах уол ыал буолалларыгар аҕалара туох бэрсэр этилэрий?» - диэн боппуруос түбэспитэ. Эппиэтэ – үтүлүк. Саамай сөбүлээбит түһүмэхпит – Саха сирин уонна Англия историялара.

Владимир Петрович Ларионов аатынан Майа орто оскуолатын «Maya team» хамаандата: «Өркөн өй» икки тылы тэҥинэн тутар уратылаах, түргэнник толкуйдуурга, саҥарарга үөрэтэр. Сахабыт норуотун итэҕэлин, Англия историятын туһунан билиибитин чиҥэттибит. Ордук биһирээбит түһүмэхпит «Тыл хонуута» - биридимиэт английскайдыы аатын этии буолар.

Айгыына Бурнашева, Валерия Ильина, Ф.Г. Охлопков аатынан Майа орто оскуолатын «Кэрэл» хамаандата:

- «Өркөн өй» бастатан туран, норуот муудараһыгар, дойдубут историятын билиигэ үөрэтэр. Холобура, өбүгэлэрбит тыйыс тымныы айылҕалаах сиргэ өркөн өйдөөх буолан тыыннаах хаалан, норуот быһыытынан тылбытын, култуурабытын сүтэрбэккэ баччааҥҥа диэри кэллэхпит. Түһүмэхтэртэн саамай уустуктара этнглийскайдыы этии оҥоруу буолар дии саныыбыт.

 

«Дебаты» муниципальнай турнир.

Турнир World School Debate Championships – WSDC Аан Дойдутааҕы оскуола үөрэнээччилэригэр аналлаах дебат халыыбынан ыытылынна. Майатааҕы лицей, В.П. Ларионов аатынан Майа, Матта и Павловскай орто оскуолатын үстүү спикердээх хамаандалара кытыннылар. Дебаты үөрэнээччилэр араатардыыр ускуустубаларын, санааларын сайа этэр, толкуйдуур, айар дьоҕурдарын сайыннарар сыаллаах тэрилиннэ. Турнир икки түһүмэхтээх. Маҥнайгы түһүмэххэ хамаандалар эрдэттэн бэриллибит «Глобализация аныгы уопсастыбаҕа дьайар мөкү өрүтэ» диэн тиэмэҕэ санааларын эттилэр, ырытыстылар. Иккис түһүмэх сорудахтара тута бэрилиннэ.

Тыҥааһыннаах «киирсии» түмүгүнэн кыайыылаахтарынан буоллулар: 1 м. В.П. Ларионов аатынан Майа орто оскуолата, 2 м. Павловскай, 3м. Майатааҕы лицей.

Старостин Вова, Портнягин Костя, Неустроева Настя, Майатааҕы лицей:

Дебаты олус интэриэһинэй, дириҥ ис хоһоонноох, элбэххэ үөрэтэр оонньуу буолар. Манна кыттан биһиги саҥарарга, тус санаабытын этэргэ, тиэмэни ырытарга үөрэнэбит. Биллэн турар, бэлэмнэнии олус элбэҕи эрэйэр. Ханнык боппуруос, тиэмэ кэлиэн сөбүн билбэппит. Ол иһин элбэҕи үөрэтэбит, ааҕабыт. Бүгүн олус күүстээх хамаандалар мустубуттар. Маҥнайгы түһүмэххэ глобализация содулун кэпсээтибит. Аныгы үйэ сайдыыта, түргэн тэтимэ биир өртүнэн дьон доруобуйатыгар, айылҕа туругар охсор.

Слава Тарскай, В.П. Ларионов аатынан Майа орто оскуолата:

- Дебаты саамай сүрүнэ түргэнник толкуйдуурга , тулуурдаах, дьулуурдаах буоларга үөрэтэр. Павловскай орто оскуолатын хамаандата олус бэлэмнээх, күүстээх дии санаатым. Глобализация араас дойдулар ситимнэһэн, хардары-таары дьайсыһан экономическай, хаһаайыстыбаннай уо.д.а өртүнэн биир сүүрээҥҥэ киирэллэрин көрдөрөр.

Робототехника турнира

Турнир республикатааҕы «Роботс-Якутск» күрэх ирдэбилинэн ыытылынна. 5-11 кылааска диэри саастарынан арахсыыта суох уопсайа 7 хамаанда кытынна: В.П. Ларионов, Ф.Г. Охлопков аатынан Майа, 2№-дээх Бэстээх, лицей, Тумул, Бырама, Төҥүлү орто оскуолалара. Күрэх 3 хайысханан ыытылынна:"Кэтэх тардыhыы", "Гонки по линии с рулевым управлением","Сумо".

Гаврильева Лилия, В.П. Ларионов аатынан Майа орто оскуолатын 7 кылааһын үөрэнээччитэ:

-Мин 4 сылбын роботехника куруһуогар сылдьабын. Роботым анал приложениенан хара суолунан сатаан ааһар. Бастакыбытын ыытарбытыгар суолтан тиэрэ барбыта. Сыыһабытын булан көннөрбүппүт. ХИФУ-га ыытыллыбыт турнирга 1 миэстэ буолбутум. Күрэххэ хас кыттааһыным аайы сайдабын, элбэҕи билэбин.

Винокуров Алеша, Аллараа Бэстээх 2№-дээх орто оскуолатын 6 кылааһын үөрэнээччитэ:

- Робототехниканан интэриэһиргээһин мин санаабар сайдыы бэлиэтэ буолар, ситиһии элбэх үлэттэн кэлэр. Робототехника куруһуогар 2 сылбын сылдьабын. Мин роботым Сумо. Атын кыттааччылар олус күүстээхтэр, бу мин маннайгы кыттыым.

Захаров Дамир, Майатааҕы лицей 5 кылааһын үөрэнээччитэ:

- Робототехниканан олус интэриэһиргиибин. Миэхэ хобби курдук буолар. Куруһуокка дьарыктаммытым 2 сыл буолла. Мин роботым сатаан кэтэх тардыһар уонна суолунан айынныыр. Бастаан ыытарга ыйааһына барыта иннигэр барбыта, ол кэнниттэн сыыһабын көннөрбүтүм. Миэхэ бу күрэххэ кыттыы иккис улахан уопут буолла. Роботым мотуорунан барар.

Күрэх түмүгүнэн, «Кэтэх тардыһыы» түһүмэххэ 1 м Төҥүлү хамаандата ылла, 2 м. В.П. Ларионов аатынан Майа орто оскуолата, 3м. Төҥүлү орто оскуолатын иккис хамаандата. "Гонки по линии с рулевым управлением" түһүмэххэ 1 м. В.П. Ларионов аатынан Майа орто оскуолатын үөрэнээччитэ Попова Алина, 2м. В.П. Ларионов аатынан Майа орто оскуолатын үөрэнээччитэ Матвеев Владик, 3 м. Аллараа Бэстээх 2№дээх орто оскуолатын үөрэнээччитэ Егоров Эрсан ылла.

Просмотров: 20 | Добавил: mayaschool | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]