14:32
Москва куоракка ыытыллыбыт Россиятааҕы үөрэнээччилэр хамсааһыннарын фестивалыгар

Бүтүн Россиятааҕы үөрэнээччилэр хамсааһыннарын фестивалыгар

Быйыл Россиятааҕы үөрэнээччилэр хамсааһыннара тэриллибитэ үөрүүлээх биир сылын бэлиэтээтибит. Бу тэрилтэ Дойдубут бары муннуктарын үөрэнээччилэрин түмэр, сомоҕолуур, биир хайысхалаахтык, биир сыаллаахтык үлэлиири, үөрэнэри көҕүлүүр. Үөрэнээччилэр Дойдубут инникитин туһугар барыбытын түмэр хамсааһыҥҥа киирэрбититтэн олус үөрэбит уонна киэн туттабыт. РДШ оҕолору бары өттүнэн сайыннарар сыаллаах, киэҥ хабааннаах, Дойду таһымнаах тэрээһиннэри ыытар. Онуоха В.П. Ларионов аатынан Майа орто оскуолатын «Клуб Ларионовцы» оҕо тэрилтэтэ бары тэрээһиннэргэ көхтөөхтүк кыттабыт.

Ааһан эрэр 2016 сыл миэхэ олус үөрүүлээх уонна бэлиэ буолла. Ол курдук, ахсынньы 9 – 12 күннэригэр Москва куоракка ыытыллыбыт Россиятааҕы үөрэнээччилэр хамсааһыннарын бастакы кыһыҥҥы Фестивалыгар кыттар чиэскэ тигистим. Тэрээһиҥҥэ Дойдубут бары муннугуттан уопсайа 300 лидер үөрэнээччилэр мустан бэйэбит региоммутун, республикабытын сырдаттыбыт. Саха сириттэн иккиэ буолан оскуолабытыгар үлэлиир оҕо общественнай хамсааһынын үлэтин туһунан кэпсээтибит. Фестиваль сыалынан-соругунан – Россияҕа олорор араас омук оҕолорун түмүү, доҕордоһууну, сомоҕо буолааһыны көҕүлээһин уонна үөрэнээччилэр баҕа санаалара, идеялара олоххо киирэрин өйөөһүн буолла. Тэрээһин бары өттүнэн олус дириҥ ис хоһоонноохтук ыытылынна. Фестивалы Россиятааҕы оҕо киинин дириэктэрэ Алиса Крюкова, РДШ бэрэссэдээтэлин көмөлөһөөччүтэ, информационнай-медийнэй хайысха салайааччыта Яна Чурикова, РФ оҕону уонна эдэр ыччаты иитии эйгэтигэр государственнай департаменын дириэктэрэ Игорь Михеев иилээн-саҕалаан ыыттылар. Тэрээһин Россиятааҕы үөрэнээччилэр хамсааһыннарын түөрт хайысхатынан ыытылынна – информационнай-медийнэй, байыаннай-патриотическай, личностнай сайдыы,  гражданскай көхтөөх буолуу. Хас хайысха аайы үөрэнээччилэри кытта араас эйгэҕэ Дойду таһымнаах биллиилээх үлэһиттэр кэлэн атах тэпсэн олорон сэһэргэстилэр,туһалаах сүбэ-ама биэрдилэр. Мин информационнай-медийнэй хайысхаҕа кытынным. Онно «Дрофа» издательство 5-7 кылаастарга аналлаах литература учебнигын автора Борис Ланины кытта көрүстүбүт уонна 2017 сылга РДШ информационнай-медийнэй хайысхатыгар үлэ торумун оҥордубут.

Фестиваль кыттыылаахтара түөрт күн иһигэр олус элбэх, үрдүк таһымнаах тэрээһиннэргэ кытынныбыт. Фестиваль үөрүүлээх аһыллыыта Норуот хаһаайыстыбатын ситиһиитин быыстапкалыыр кииҥҥэ тэрилиннэ. Онно «Россия – моя история» историческай паркаҕа Бүтүн Россиятааҕы патриотическай форум уонна Геройдар күннэрэ ыытылынна. Маны сэргэ «Экспериментариум» занимательнай наука музейын сэргээтибит, Москватааҕы филармонияҕа Кай уонна Герда туһунан  симфоническай остуоруйа көрдүбүт.

 

Фестивалга кыттан Дойду араас муннугуттан олус көхтөөх, көрдөөх, үтүө доҕоттордоммуттан уонна киэҥ түһүлгэҕэ Республикабар оҕо тэрилтэтин үлэтин туһунан сырдаппыппыттан олус үөрдүм. Маннык киэҥ хабааннаах тэрээһиҥҥэ кыттан кырдьыга да, киһи бары өттүнэн сайдар эбит диэн бигэ итэҕэйдим. Бука бары үөрэнээччилэргэ оскуолаҕыт ыытар бары тэрээһиннэригэр көхтөөхтүк кыттыҥ, улуускут, Республикабыт туһугар айымньылаахтык үөрэниҥ, үлэлээҥ диэн ыҥырыам этэ.

Андрей Антонов, В.П. Ларионов аатынан Майа орто оскуолатын 11 «а» кылааһын үөрэнээччитэ, «Мэҥэбил» эдкорпост.

 

Просмотров: 566 | Добавил: mayaschool | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]