Главная » 2017 » Октябрь » 17 » Музыка барыбытыгар
21:29
Музыка барыбытыгар

Музыка барыбытыгар

В. П. Ларионов аатынан Майа орто оскуолатыгар оҕону олоххо бэлэмнээх, бары өттүнэн дьоҕурдаах, талааннаах киһи гына иитэн таһаарыыга улахан болҕомто ууруллар. Кылаас аайы үөрэнээччи талаанын арыйыыга, сайыннарыыга араас хайысхалаах ФГОС чаастара ыытыллаллар. Ол курдук алын сүһүөххэ 2014 сылтан оҕолору тыыннаах музыка кэрэ эйгэтигэр үөрэтэр «Музыка бырыбытыгар» бырайыак үлэлиир. Ол чэрчитинэн үөрэнээччилэр кылааһынан бүттүүн музыка инструменыгар – чуолан флейтаҕа оонньуу үөрэннилэр. Тыыннаах музыка алыптаах эйгэтигэр уһуйуллуу туһунан бырайыак салайааччылара Раиса Скрябина, Светлана Борисова уонна кинилэр үөрэнээччилэрэ бу курдук кэпсииллэр:

Раиса Скрябина, Светлана Борисова, музыка учууталлара:

  • 2012 с. Республикабытыгар бастакы президент Михаил Николаев көҕүлээһининэн «Музыка барыбытыгар» бырайыак тэриллибитэ. Онно Москва куораттан ыҥырыллыбыт Борис Эдуардович музыка учууталларыгар араас инструменнарга оонньуурга, итиэннэ инникитин ону үөрэнээччилэргэ тиэрдэрии ньыматыгар үөрэппитэ. Ол түмүгэр, эһиилигэр бу бырайыакка сүүмэрдээһини ааһан биһиги оскуолабыт республика 30 тирэх оскуолатын кэккэтигэр киирбитэ. Дьэ ол күнтэн ыла бүтүн кылааһы ылан дьарыктаан барбыппыт. Бастаан тыас таһаарар уонна сахалыы инструменнарга үөрэппиппит – хомус, дьаҕа, металлофон, мелодика, треугольник. Онтон кылаас салайааччыларын, төрөппүттэр, оҕолор уопсай сүбэлэринэн атыылаһарга да, маассабайдык үөрэнэргэ да табыгастаах буолсу диэн флейтаны талбыппыт. Билигин бырайыакка түөрт кылаастан уопсайа 100-чэкэ оҕо дьарыктанар ().О5олор бу бырайыагынан нэдиэлэ5э 3 чаас үөрэнэллэр, эбии дьарык быһыытынан 2 чаас бэриллэр. Флейта атын дойдуларга балай да тарҕаммыт норуокка киэҥник туттуллар инструмент буолар. Биһиги республикабытыгар биирдиилээн музыканнар, эбэтэр оркестрга оонньууллар. Төһө да дьоҕус көрүҥнээҕин иһин, бу инструмент оҕону музыка бары кистэлэҥнэригэр үөрэтэр. Флейтаҕа оонньуур оҕо нуота бары көрүҥнэрин, музыканы сөпкө истээһин, таба тыыныы туһунан киэҥ билиини ылар. Кылааһынан бүттүүн оонньуур буоланнар, бэйэ бэйэни истиһэргэ, убаастаһарга, түмсүүлээх буоларга үөрэнэллэр. Маҥнайгы кылаастарга үс нуотаттан саҕалаан үөрэтэбит, иккис кылааска сэттэ нуотаны барытын туһанан араас музыка таһаарар буолаллар. Инникитин норуот инструменын оркестрын тэрийэр былааннаахпыт

Люба Бурнашева, 4 «в» кылаас:

- Мин флейтаҕа оонньуурбун олус сөбүлүүбүн. Бу оскуолаҕа иккис кылааска көһөн кэлбит буоламмын инструмеҥҥа иккис сылбын үөрэнним. Ол да буоллар, учууталым Раиса Александровна түргэник ылынаҕын диэн хайгыыр. Кини биһиэхэ бастаан нуоталары үөрэппитэ, онтон флейтанан хайдах туттары көрдөрбүтэ. Хаҥас илииҥ үөһээ турар, уҥа илииҥ аллараа буолуохтаах. Дьэ уонна нуоталары баттааҥҥын уонна үрэҥҥин кэрэ бэйэлээх тыастаах музыка таһаараҕын. Мин уруокка нуотаны көрдүм да илиистэн тыаһатан барабын. Араас куонкурстарга кыттабын. Сөбүлүүр репертуарым – «Детская мозайка».

Дьулустаан Петров, 3 «б» кылаас:

  • Мин флейтаҕа 1 кылаастан оонньуубун. Флейтабыт дьарыга буоларын олус кэтэһэбит. Флейта духовой инструмент буолар. Айаххынан үрэҥҥин, нуоталары баттаан музыка тыаһатаҕын. Кылааһынан «Сайын», «Маленькая елочка» диэн музыканы тыаһатабыт. Флейтаҕа оонньуурга бастаан нуоталары үөрэппиппит, уопсайа сэттэ нуота баар. Флейта атын инструменнартан үөрэтэргэ, туттарга быдан судургу дии саныыбын. Флейталаан киһи толкуйдуурга, музыканы истэргэ үөрэнэр.

Андрей Расторгуев, Коля Куличкин, 2 «а» кылаас үөрэнээччилэрэ:

- Биһигини флейталыырга Светлана Аркадьевна үөрэппитэ.Флейтаҕа оонньуу үөрэнэргэ нуоталары үөрэтии уустук эбит. Ол эрээри биһиги кыһаллан үөрэнэммит сатыыр буоллубут. Билигин нуоталары көрөн туран төһө баҕар оонньуохпутун сөп. Оттон сорох оҕолор нуотанан буолбакка, музыканы истэн таһаараллар. Флейта музыканы истэргэ, болҕомтолоох буоларга үөрэтэр. Флейтаҕа оонньооһун туспа ньымалаах. Инструмеммытын хаҥас илиибитинэн тутабыт, уҥа илиибитинэн өйүүбүт. Муннубутунан үчүгэйдик тыын ылан бараммыт тылбыт көмөтүнэн айахпытынан үрэммит тыас таһаарабыт. Аны мээнэ үрдэххинэ музыка сатаммат. Флейта нуоталарынан араарыллыбыт анал хайаҕастардаах. Ону сөпкө баттыахха наада. Биһиги флейталыыр буоламмыт араас кэнсиэрдэргэ кыттабыт. Учууталбытыгар махталбытын тиэрдэбит.

Бу курдук В.П. Ларионов аатынан Майа орто оскуолатын үөрэнээччилэрэ күннэтэ тыыннаах музыка ураты дьүрүлгэнгэр уйдаран кэрэни кэрэхсииргэ, үчүгэйгэ дьулуһарга үөрэнэллэр.

Изабелла Романова

Просмотров: 41 | Добавил: mayaschool | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]