Главная » 2017 » Май » 5 » "Начинающий фермер" Бүтүн Россиятааҕы күрэххэ кыайыылаах буоллубут
08:12
"Начинающий фермер" Бүтүн Россиятааҕы күрэххэ кыайыылаах буоллубут

Мүөттээх ыҥырыаны иитэр туһалаах

В.П. Ларионов аатынан Майа орто оскуолатын 10 кылааһын үөрэнээччилэрэ Александров Саша, Соловьев Сеня уонна Анисимов Саша Москва куоракка ыытыллыбыт Бүтүн Россиятааҕы «Начинающий фермер» интеллектуальнай оонньууга кыайыылаах үрдүк аатын cүктүлэр. Күрэх V төгүлүн Россиятааҕы тыа хаһаайыстыбатын министерствотын, тыа ыччатын холбоһугун, үөрэх уонна наука министерствотын көҕүлээһиннэринэн үөрэнээччилэр тыа хаһаайыстыбатыгар бизнес былаанныыр, тэринэр, салайар дьоҕурдарын сайыннарар сыаллаах ыытылынна. Дойду араас муннугуттан уопсайа 76 хамаанда сайаапка биэрбититтэн сүүмэрдээһини ааһан 46 хамаанда кытынна. Республика чиэһин көмүскүү тиийбит уолаттарбыт Уһук Хоту сир услуобуйатыгар «Майа мүөт» К(Ф) Х-ҕа мүөтү оҥорон таһаарыы уонна мүөттэн оҥоһуллар бородууксуйалар» диэн бырайыагынан кытыннылар. Күрэх маҥнайгы түһүмэҕэ үс салаанан ыытылынна: оскуола үөрэнээччилэрэ, орто, үрдүк үөрэх хамаандалара. Тыҥааһыннаах киирсии түмүгүнэн, финалга 15 хамаанда таҕыста, олор кэккэлэригэр В.П. Ларионов аатынан Майа орто осуолатын хамаандата оскуола оҕолоруттан соҕотох биир бастакынан киирдэ. Далааһыннаах күрэххэ I миэстэни ылбыт уолаттарбыт киэҥ хабааннаах интеллектуальнай оонньууга хайдах кыттыбыттарын туһунан тус бэйэлэриттэн туоһуластым:

  • «Начинающий фермер» интеллектуальнай оонньуу бастаан республика иһинэн ыытыллыбыта. Онно биһиги оскуолабыт хамаандата кыайыылаах буолан Бүтүн Россиятааҕы күрэххэ кыттар чиэскэ тигитсибит. Финалга күрэхтэргэ хаһыс да төгүлүн кыттар орто, үрдүк үөрэх кыһатын устудьуоннары кытта киирсэн кыайыылаах буоллубут. Биһиги оскуолабыт агро хайысхалаах буолан, мүөттээх ыҥырыаны иитиинэн иккис сылын дьарыктанабыт. Билиҥҥи туругунан 10 семьяны иитэбит. Уопсайа 45 киилэ мүөтү ылбыппыт. Сайыҥҥы өттүгэр пассекабытын Хаптаҕайга баар «Юность» лааҕырыгар көрөбүт, кыһынын оскуолабыт хаһаайыстыбатын базатыгар тутабыт. Ыҥырыаларбыт среднерусскай боруодалаахтар. Бу ыҥырыалар мүөтү саамай түргэнник хомуйаллар, биһиги услуобуйабытыгар сөп түбэһэллэр. Үөрэнээччилэр ыҥырыаны иитии, бэйэбит мүөппүтүттэн араас бородууксуйаны оҥоруу туһунан баһаам элбэх бизнесбырайыактары да, дакылааттары да суруйан араас ааҕыыларга, күрэхтэргэ ситиһиилээхтик кытталлар. Онон, бу күрэххэ кыайыыбыт – оскуолабыт уопсай ситиһиитэ буолар. Үөрэнээччилэрбит мүөттэн доруобуйаҕа туһалаах мыыла, ваннаҕа тутталар бомбочка, шоколад, торт, маринад, тигээйилэр кыстыктарыгар сиир канди астарын оҥороллорун туһунан сырдаттыбыт уонна мүөппүтүн бэйэтинэн илдьэн көрдөрдүбүт. Бу барыта оскуолабытыгар күннэтэ ыытылла турар үлэ буолар. Дьүүллүүр сүбэ, атын да кыттааччылар бизнес-бырайыакпытын олус сэргээтилэр, бородууксуйабыт арааһа элбэҕиттэн сөхтүлэр. Атын регионнартан ыҥырыаны иитиинэн дьарыктанар хамаандалар бааллара, ол эрээри, кинилэр көннөрү мүөтү бэйэтинэн атыылылларын туһунан кэпсээбиттэрэ, бородууксуйа оҥорботтор эбит. Биһиги Татарстантан кэлбит хамаанда коза ахсаанын элбэтии уонна коза үүтүттэн сыыр оҥороруу туһунан бырайыактарын олус сэргээбиппит. Маннык киэх хабааннаах күрэххэ кыттан киһи бары өттүнэн сайдар уонна бизнесбылааннааһыҥҥа, бырайыактыырга билиитин-көрүүтүн хаҥатынар эбит дии санаатыбыт.

Бу курдук, В.П. Ларионов аатынан Майа орто оскуолатын үөрэнээччилэрэ Дойду таһымнаах күрэххэ оскуолаларын ураты үлэлэрин –ыҥырыаны иитии туһунан сырдатан кыайыылаах үрдүк аатын сүгэн сыаналаах бириистэрин уонна Россиятааҕы тыа хаһаайыстыбатын, үөрэҕин министиэристибэлэрин грамотатынан наҕараадаланнылар.

Андрей Антонов, В.П. Ларионов аатынан

Майа орто оскуолатын 11 кылааһын үөрэнээччитэ, «Мэҥэбил» эдкорпост.

Просмотров: 67 | Добавил: mayaschool | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]