Главная » 2017 » Октябрь » 17 » Норуот тылынан уус-уран айымньыта. Эбии үөрэхтээһин
21:31
Норуот тылынан уус-уран айымньыта. Эбии үөрэхтээһин

Өбүгэ утума

Саханы саха дэппит, Аан Дойду шедевринэн биллибит оһуордаах-дьарҕаалаах, байылыат уус-уран тыллаах саха норуотун төрүт Олоҥхото оччоттон баччаҕа диэри уостан уоска бэриллэн быстыбат ситимнэммитэ барыбытын үөрдэр. Онуоха, күнтэн күн олоҥхонон дьарыктанар кэнчээри ыччат ахсаана хаҥаан иһэрэ хайҕалаах суол буоларСаха олоҥхотун сөбүлүүр дьарык оҥостубут оҕолортон биирдэстэрэ – В.П. Ларионов аатынан Майа орто оскуолатын 3 «б» кылааһын үөрэнээччитэ Настя Черкашина буолар. Настя 7 сааһыттан олоҥхолуур, уус-уран салайааччыта – Валентина Кривошапкина. Настя таһыттан көрдөххө саҥа үүнэн эрэр сибэкки курдук нарын-намчы кырачаан кыыс буоллар, бэрт элбэх, улахан ситиһиилэрдээх. Кини улуустааҕы, республикатааҕы «Уруйдан олоҥхобут» күрэх хас да төгүллээх дипломана, лаурета. Быйыл «Зов земли олонхо» норуоттар икки ардыларынааҕы күрэххэ ситиһиилээхтик кыттыбытын, анал аат хаһаайына буолбутун иһин Москва куоракка ыытыллар «Сохраняем традиции» норуоттар икки ардыларынааҕы күрэххэ ыҥырыы туппут. Онон биһиги Настяны ыҥыран сөбүлүүр дьарыгын туһунан сэһэргэһэргэ сананныбыт.

Бастакы толорбут олоҥхоҥ ханныгый?

- Олоҥхолуурбун оҕо саадыгар сылдьыахпыттан саҕалаабытым. Оскуолаҕа киирэн баран толорбут бастакы олоҥхом – «Уолан Дохсун Бухатыыр». Манна Орто Дойду дьонун харыстыыр, араҥаччылыыр аналлаах Уолан Дохсун Бухатыыр хорсун быһыыларын туһунан кэпсэнэр.

Олоҥхону толоруу туох уустуктааҕый?

- Сүрүн уустуга, мин санаабар, оруолларын тойук туойуу буолар. Тоҕо диэри, көрдөрөр уобараһыҥ, геройуҥ ис туругар киириэххин наада. Мин олоҥхолуурбар барытын өйбөр оҥорон көрөбүн. Хайдах курдук быыппастар былчыҥнаах, күүстээх, хорсун бухатыырдар аттарыгар көтүтэн иһэллэрин, кэрэ куолар уһун суһуохтарын намылыччы түһэрэн тойук туойалларын – бу барыта харахпар киинэ курдук көстөр.

Олоҥхону үөрэтии кистэлэҥнэрин үллэстиэҥ дуо?

  • Бастатан туран, Олоҥхону ис сүрэххиттэн таптыыр буолуоххун наада. Мин уһун олоҥхолору үөрэтэрбэр бастаан ис хоһоонун ааҕабын, сюжетын үөрэтэбин. Ыарырҕаттахпына, учууталым Валентина Федоровна быһааран биэрэр. Онтон хоһоон курдук нойосуус үөрэтэбин. Бу кэнниттэн туойан толорорго холонобун. Дьиэбэр эһээм Владимир Коммунарович көмөлөһөр, сорох тылларын быһааран биэрэр, онон киниэхэ бастакыннан иһитиннэрэбин.

Олоҥхо киһини туохха үөрэтэрий?

- Бастатан туран, сахалыы уус-уран тылгын-өскүн, саҥарар, оҥорон көрөр дьоҕургун сайыннарар, ыллыырга, туойарга үөрэтэр. Сөбүлүүр дьарыктаах буоламмын атын оҕолору кытта билсэбин, сири-дойдуну кэрийэбин, саҥаҕа үөрэнэбин. Атын оҕолору олоҥхону ааҕыҥ диэн ыҥырыам этэ.

Кырачаан олоҥхоһукка – Настяҕа Олоҥхоҕо кэпсэнэр Аал Луук мас курдук үүнэ-сайда, чэчирии турарыгар баҕарыаҕыҥ! Настя курдук саха төрүт фольклорунан дьарыктанар кэнчээри ыччат баарын тухары Саха норуота сүппэт-оспот аналланыа диэн эрэнэбит.

Изабелла Романова

Просмотров: 67 | Добавил: mayaschool | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]