Главная » 2020 » Февраль » 23 » Новости агро-блока
23:58
Новости агро-блока

Академик Владимир Петрович Ларионов аатынан Майа орто оскуолатыгар билиҥҥи тэтимнээх олоххо тус миэстэтин булунар, тыа сиригэр олорон үлэлиир-хамсыыр сатабыллаах, булугас өйдөөх оҕону иитэн таһаарыыга улахан болҕомто ууруллар.

Агротехнологическай, политехническай хайысханан үлэлиир, бизнес-инкубатордаах оскуолабытыгар үөрэнээччилэр эбии дьарыкка, куруһуокка, лааҕырдарга үүнээйини олордорго, хаһаайыстыбаны тэринэргэ, дьаһанарга үөрэнэбит. Оскуолабыт агро үлэтин чэрчитинэн мүөттээх ыҥырыаны, араас көтөрү, куруолугу иитэбит, оҕуруот аһын үүннэрэбит, хортуоппуй олордобут, эмтээх отунан дьарыктанар фитобардаахпыт.

«Хатан» сурунаал ааҕааччыларын оскуолабыт подсуобунай хаһаайыстыбатыгар бу ыстатыйа нөҥүө ыалдьыттыыргытыгар ыҥырабыт!

Үөрэнээччилэр бука бары сөбүлээн, интэриэһиргээн күннэтэ киирэр-тахсар, үгүстүк сылдьар сирбитинэн оскуолабыт таһыгар турар көтөрдөрү, куруолуктары иитэр, көрөр-истэр дьиэ буолар. Манна биһиги кроликтары, перепелкалары, индюктары, араас боруодалаах кустары иитэбит. Хаһаайыстыбаны оскуолабыт агро-блогун үлэһитэ Ирина Карпова үөрэнээччилэри кытта көрөр-истэр.

Уопсайа 20 улахан куруолуктаахпыт: «Сиэрэй великан» уонна «Калифорнийскай» боруодалаахтар. Билигин халлаан сылыйан төрүүр-ууһуур кэмнэрэ саҕаланна. Икки куруолук номнуо оҕолонон киһи эрэ таптыы көрөр түү мээчик курдук 10 кырачаан куруолуктардаахпыт. Төрүүллэригэр түүлэрин үргэнэн уйа оҥостоллор, оҕолорун эмнэрэн улаатыннараллар. Оҕолор куруолуктары анал комбикорумунан аһатабыт.

Перепелкаларбыт уонна индюктарбыт күн аайы сымыттыыллар. Ону оскуолабыт инкубаторыгар таһааттарабыт, ордубутун нэһилиэнньэҕэ атыылыыбыт. Инкубатор көтөрдөргө саҥа олоҕу үөскэтэр уйа буолар. Манна сымыыттарбытын кэчигирэтэн уурабыт уонна күнүстэри-түүннэри 37 сылаас температураны тутан туруорабыт, күн аайы уу кутан кэтиибит-маныыбыт. Күүтүүлээх күммүт үүнэн перепелкабыт сымыыта – 15-22, индюк – 20-25 күнүнэн тэстэллэр. Оо, оччоҕо оскуоланан бука бары олус да үөрэбит! Ол эрээри элбэх буолан саба түспэппит. Тоҕо диэри, сымыыттан саҥа тахсыбыт көтөр олус куттас буолар. Кырачаан индюктары уонна перпелкалары анал уйаҕа уган иитэбит. Перепелкаларбыт фараон аҥардаах боруодалаахтар, билигин уопсайа 60 кэриҥэ перепелка оҕото баар.

Кустарбыт араас боруодалаахтар – хара өҥнөөх Каюга, Хаки-кемпбелл, Башкирка, Бегунок. Төһө да араас боруодалаах буоллаллар бука бары олус иллээхтик-эйэлээхтик ыаллаһан олороллор. Быйыл күһүн дьиикэй хаас кустарбытыгар саҥа дьукаах буолбута. Бу хаас биһиэхэ кэлбит остуоруйатын 2-с а кылаас үөрэнээччитэ Амелия Карпова сэһэргиэҕэ:

  • Бу күһүн биһиги оскуолабытыгар араанньа буолбут хааһы аҕалбыттара. Быһыытынан-таһаатынан чинчийэн көрбүппүт «Писькулька» диэн хаас эбит. Писькульканы биһиэхэ аҕалалларыгар кыната тостон баран сап саҕаттан иҥнэн сылдьар этэ.Доруобуйатын туруга олох мөлтөҕө, хараҕын нэһиилэ кыламнатан көрөрө. Бэтэринээр көрөн баран кынатын быспыта уонна бааһын эмтээбитэ. Билигин Писькулька атын кустары кытта ыаллаһан олорор, үчүгэй туруктаах.

Мин дьиикэй хаас бу көрүҥүн чинчийэр үлэ оҥороммун «Инникигэ хардыы» НПК-ҕа ситиһиилээхтик кыттыбытым.

Көтөрдөр астарын-үөллэрин туһунан:

Көтөрдөрбүт бука бары анал комбикормунан аһыыллар уонна эбиэстэн үүнэр күөх үүнээйи отун сииллэр. Бу декоративнай үүнээйини оскуолабытыгар үүннэрэбит. 10 күн устата туран оскуола салгынын ыраастыыр. Онтон ситэн саһаран эрдэҕинэ оҕолор кырыйан көтөрдөргө, перпелкаларга күндүлүүбүт. Эбиэс ото олус битэмииннээх, көтөрдөр уҥуохтара кытаатарыгар, сымыыттарын хаачыстыбата тупсарыгар олус туһалаах.

Бу курдук, биһиги оскуолабытыгар олус элбэххэ үөрэнэбит. Оскуолабытыгар баар тыннар тыннаахтары, көтөрдөрдөрү, кыллары олуһун таптыыбыт!

Саина Никитина, Айыллаана Кириллина, В.П. Ларионов аатынан Майа орто оскуолатын «Мэҥэбил» пресс-киинин эдэр кэрэспэндьиэннэрэ

 

Просмотров: 37 | Добавил: mayaschool | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]