Главная » 2020 » Июнь » 28 » Новости из журнала "Мэҥэбил". Выпуск-2020
00:58
Новости из журнала "Мэҥэбил". Выпуск-2020

Оскуола дьоллоох кэмнэрэ

Хас биирдии оҕо оскуолаҕа саҥа билиини ылар уонна дьиҥнээх доҕотторун булар. 11 сылы быhа бииргэ үѳрэммит доҕотторбутун иккис дьиэ кэргэммит кэриэтэ күндүтүк саныыбыт. Биhиги оскуолабытын сүүрбэ алтыа буолан бүтэрэбит. Бэһис кылаастан арыаллаан илдьэ сылдьар кылааспыт салайааччыта – Харитонова Парасковья Афанасьевна. Кини олус эйэҕэс, ирдэбиллээх, биһиги туспутугар олус кыһаллар. Учууталбыт үтүө сүбэтинэн ѳрүү кыайыыга дьулуhабыт.

Биhиги таһаарыылаахтык үлэлиир, олоҕу кытта тэҥҥэ хардыылыыр оскуолаҕа үөрэнэн олус сайынныбыт. Аҕыс туйгун үөрэнээччилэхпит, уон түөрт оҕо «4» уонна «5» сыанаҕа үөрэнэр. Оскуола чаҕылхай лидэрдэрэ биһиги кылааспытыгар бааллар. Холмогоров Денис – улуустааҕы «Мэҥэ кэскилэ» оҕо тэрилтэтин салайааччыта, онтон Игнатьева Дайаана – 2018-19 с «Клуб Ларионовцы» оҕо тэрилтэтин лиидэрэ.

Кылааспыт оҕолоро Дойду таһымнаах күрэхтэһиилэргэ республика аатын үрдүк таһымнаахтык көмүскүүллэр. Игнатьева Даяна «Молодой предприниматель России – 2018» күрэх кыайыылааҕа. Баишев Роберт уонна Гоголев Андрей Бүтүн Россиятааҕы 3D моделирование олимпиадатыгар бастакы миэстэ буолбуттара. Бүтүн Россиятааҕы «ЮННАТ» күрэххэ Герасимова Лида кыайыылаах үрдүк аатын ылбыта, оттон биһиги Баишев Робертыын финалист буолбуппут. Челябинскай куоракка ыытыллыбыт норуоттар икки ардыларынааҕы дипломатическай оонньууга Баишев Роберт, Егоров Антон, Гаврильев Игорь, Соломонов Айтал, Баягантаева Тоня, Игнатьева Дайаана, Сидорова Лена финалга киирэн 4 миэстэ буолбуттара. 2018 с. Ыытыллыбыт норуоттар икки ардыларынааҕы интеллектуальнай оонньууга  Гоголев Андрей, Скрябин Вася, Баягантаева Тоня, Герасимова Лида, Игнатьева Дайаана, Тастигина Тоня кыттыбыттара. World Skills күрэхтэhии компетенцияларыгар кылааспытыттан 13 оҕо улууспут, республикабыт чиэhин кѳмүскээбиттэрэ.

Спорттан эмиэ туора турбаппыт. Мичил Илларионов, Вася Скрябин, Дьулусхан Тихонов, Варьяна Шеломова – улууспут, оскуолабыт бастыҥ спортсменнара.

Григорьев Денис – Бүтүн Россиятааҕы «Байыаннай-спортивнай кыайыы» ооньуу, Черкашин Саша, Тихонов Дьулусхан, Цыпандин Вадим Белорусияҕа ыытыллыбт патриотическай десант кыттыылаахтара. 

Алын кылаастан «Тускул» ансаамбылга ыллыыбыт. Раиса Александровна Скрябина уонна Светлана Аркадьевна Борисова биһигини ырыа кэрэ эйгэтигэр уһуйбут күндү учууталларбыт буолаллар. Ансаамбылынан норуоттар икки ардыларынааҕы куоҥкурустарга кыттан араас дойдулары – Кытайы, Турцияны, Европа куораттарын, Францияны көрдүбүт, киэҥ түһүлгэҕэ ыллаатыбыт. Санкт-Петербург куоракка ыытыллыбыт «Салют талантов» бэстибээлгэ кыттан лауреат буолбуппут. Атын дойдуга сылдьан, улахан куоҥкурустарга кыттан олус сайынныбыт, атын норуоттар култуураларын кытта билистибит.

Орто кылаастарга сылдьан кылааспыт салайааччытыныын «Малая академия наук» үөрэнэн кэлэрбит. Онно араас наукалары кытта билиһиннэрбиттэрэ.

Төһө да ыраах сирдэргэ, араас лааҕырдарга сырыттарбыт, саамай сөбүлүүр сынньанар сирбит – оскуолабыт «Юность» лааҕыра буолар. Хас биирдии үѳрэнээччи оскуолабыт Хаптаҕайдааҕы «Юность», Дойдутааҕы лааҕырдарыгар сылдьыахтаах дии саныыбын. Оччоҕо эрэ киһи оскуола дьоллоох кэмнэрин толору билэр. Айылҕаҕа кылааһынан оонньуур-көрүлүүр, үөрэр көтөр, учууталгын кытта доҕордоһор кэриэтэ үчүгэй туох да суоҕа буолуо… Оскуолабыт лааҕырдара – оҕо сааспыт дьоллоох уйата.  Чугас ѳрүскэ, күѳлгэ сѳтүѳлээн, оскуолабыт иитэр кыылларын кѳрѳн-истэн умнуллубаттык сайылыырбыт.  

Сыллата кылааһынан араас бырайыактары олоххо киллэрэрбит – ырыа килииптэрин устуу, айар үлэбит хомуурунньугун таһаарыы, араас айан…

Иккис ийэбит кэриэтэ күндүтүк саныыр учууталбытыгар Парасковья Афанасьевнаҕа, араас биридимиэттэри үөрэппит бары учууталларбытыгар, оскуола салалтатыгар уонна бары үлэһэттэригэр улахан махталбытын тиэрдэбит. Биһиги оскуолабытын өрүү ахта-саныы сылдьыахпыт. Оскуолабыт аатын хаһан да түһэн биэриэхпит суоҕа диэн эрэнэбит!

Лена Сидорова, «Мэҥэбил” эдкорпост

Просмотров: 16 | Добавил: mayaschool | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]