Главная » 2020 » Июнь » 28 » Новости из журнала Мэҥэбил. Выпуск-2020.11б
01:01
Новости из журнала Мэҥэбил. Выпуск-2020.11б

Оҕо саас кэрэ кэмнэринэн арыалланан оскуола дьоллоох сыллара түргэнник да элэҥнээн аастылар! Аҕыйах хонугунан бүтэһик чуораан лыҥкыныа, оскуоланы бүтэрэн олох киэҥ аартыгар үктэниэхпит.

Бэҕэһээ курдук өйдүүбүт – 11 сыл аннараа өттүгэр сибэкки дьөрбөтө тутуурдаах кырачаан кыргыттар, уолаттар маҥнай оскуола боруогун атыылаабыппытын... Маҥнайгы учууталбыт Татьяна Егоровна Афанасьева биһиэхэ сүрэҕин сылааһын бэлэхтээн, сырдыкка, кэрэҕэ уһуйбута.

Бэһис кылаастан биһиэхэ ийэлии истиҥник сыһыаннаһар кылааспыт салайааччыта – нуучча тылын учуутала Нарыйаана Гаврильевна Илларионова буолар. Кылааһынан биир дьиэ кэргэн кэриэтэ олус иллээхпит-эйэлээхпит, түмсүүлээхпит. Оскуолаҕа ыытыллар «Көмүс күһүн», «Ларионовскай баал», «Коммунарскай», «Байыаннай» сбордар уонна да атын бары тэрээһиннэрэ көхтөөктүк кыттан, кыайыы аргыстанан, олус үөрэрбит-көтөрбүт... Агро оскуолаҕа үөрэнэрбит быһыытынан, сыл аайы айылҕаҕа тахсан эмтээх от хомуйан, арассаада үүннэрэн, атыылаан, кылааспытыгар харчы киллэрэн бириэмэбитин туһалаахтык атаарарбыт. Бу дьоллоох түгэннэрбит туһунан үтүө үйдөбүл хас биирдиибит сүрэҕэр туспа миэстэ булан умнуллубаттыы уйаланыа...

Кылааспыт оҕолоро бука бары олус талааннаахтар, киэн туттар үөрэнээччилэрдээхпит. Үөрэххэ, спортка кэккэ ситиһиилэрдээхпит. Республика, дойду, норуоттар икки ардыларынааҕы бэстибээллэргэ, научнай-практическай кэмпириэнсийэлэргэ, олимпиадаларга, «World skills» чемпионаакка, «Уолан» ааҕыларга кыттан бириистээх миэстэлэргэ тиксэрбит.

Оскуолабыт кэмнэрин биир бэлиэ түгэнинэн сыл аайы Дойду, Хаптаҕай нэһилиэгэр баазаламмыт «Юность» үлэ-сынньалаҥ лааҕырыгар сайылыырбыт буолар. Сыл устата үөрэммит, араас күрэхтэргэ буһа-хата кыттыбыт оҕолор самаан сайын буоллар эрэ, үөрэ-көтө лааҕырбытыгар барарбыт. Оо, онно буолар этэ эбээт – үөрүү-көтүү, сөтүөлээһин, доҕордоһуу...Оҕо саас дьоллоох кэмнэрэ!

Кылаас олоҕун умнуллубат түгэннэриттэн биирдэстэринэн айан буолар...Кылааһынан Саха сирин бэлиэ сирдэрин билээри «Күрүлүүр», «Булуус», «Турук Хайа» бэлиэ сирдэригэр сылдьыбыппыт. Кэрэ айылҕалаах Аммаҕа икки төгүл төрөппүттэрбитин кытта  сынньанан, балыктаан, дуоһуйа сөтүөлээн, оонньоон-көрүлээн ааспыппыт. Санкт-Петербург куоракка баран кэлбиппит. Онно «Эрмитаж», «Царское село» уонна да атын бэлиэ сирдэри көрбүппүт.

Оскуолабыт киэн туттар, көхтөөх уонна түмсүүлээх кылааһа буолабыт. Олохпут биир саамай сырдык өйдөбүллэрэ, кэрэ түгэннэрэ, оҕо сааспыт умнуллубат кэмнэрэ оскуолабытыгар аастылар...

Оскуолабыт дириэктэригэр Светлана Кимовна Игнатьеваҕа, кылааспыт салайааччытыгар Нарыйаана Гаврильевнаҕа, таптыыр учууталларбытыгар – Светлана Николаевнаҕа, Матрена Михайловнаҕа, Галина Ивановнаҕа, Саргылана Михайловнаҕа, Валентина Васильевнаҕа, Людмила Михайловнаҕа, Игнат Ивановичка, Айталина Варламовнаҕа махтанабыт. Баҕарыбыт айымньылаах үлэни, доруобуйаны, баҕа санааҕыт барыта туоллун!

Бииргэ үөрэммит доҕотторбутун, оскуолабытын хаһан даҕаны умнуохпут суоҕа.

Айна Осипова, Мэҥэбил эдкорпост

 

Просмотров: 13 | Добавил: mayaschool | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]