Саха оһоҕун иннигэр олордо да олоҥхоһут, о5уьун мииннэ да ырыаһыт...
В.П. Ларионов аатынан Майа орто оскуолатыгар кэнчээри ыччаты төрүт үгэскэ, норуот тылынан уус-уран айымньытыгар сыһыаран ырааҕы ырыҥалыыр, дойдутугар, норуотугар бэриниилээх киһи гына иитэн таһаарыы айымньылаах үлэтэ тэтимнээхтик ыытыллар.
Оскуолаҕа алтыс сылын «Чугдаар» фольклор куруһуога таһаарыылаахтык үлэлиир. Салайааччылар: Ефремова У.М., Кривошапкина В.Ф. Оҕолор уруогу таһынан эбии дьарыктарга, куруһуокка норуот тылынан уус-уран айымньытын бары көрүҥнэригэр тиһиктээхтик уһуйуллаллар.
Айымньылаах салайааччылар саха ыччатын фольклорга уһуйууну бүтүн республика таһымыгар көҕүлүүллэр. Ол курдук, иккис сылын республикатааҕы «Чугдаар-туой күн оҕото» аһаҕас фольклорнай фестивалы киэҥ хабааннаахтык тэрийэн ыыталлар. Фестиваль быйыл кэтэхтэн көрүү быһыытынан ыытылынна. Республика 16 улууһуттан (Кэбээйи, муома, Верхоянскай, Ньурба, Уус-Алдан, Амма, Мэҥэ-Хаҥалас, Бүлүү, Үөһээ Бүлүү, Сунтаар, Орто Халыма, Хаҥалас, Дьокуускай, Алдан), 350 оҕо кытынна.
Саха норуотун тылынан уус-уран айымньытын үйэтитии, сөргүтүү соргулаах суолугар туруммут кэнчээри ыччаттарбыт быйыл үс хайысханан күөн көрүстүлэр
Норуот ырыата: тойук, олоҥхо тойуктара, норуот ырыата.
Уус-уран ааҕыы: үгэ, чабырҕах, олоҥхо.
Саха төрүт инструменнарыгар оонньооһун: кырыымпа, хомус, күпсүүр, дьаҕа, таҥсыыр.
Кылаан чыпчаал үрдүк аатын ыллылар:
Норуот ырыатыгар – Уус-Алдан Кэптэнититтэн, 8 кылаас үөрэнээччитэ Ваня Колодезников, «Улуу Кыайыы тойуга», сал. Лугинова З.П.
Саха төрүт инструменнарыгар оонньооһун: - «Амма чэчирэ» оҕо образцовай фольклорнай бөлөҕө, салайааччылар: Петрова Т.Н., Харитонова С.В.
Уус-уран ааҕыы: В.К. Короленко аатынан Амма 1№-дээх орто оскуолатын 6 кылааһын үөрэнээччитэ Дьяконова Надя, «Дыырай Бэргэн» олоҥхо.
|
