Главная » 2016 » Октябрь » 18 » Оскуола лидерин таллыбыт
10:01
Оскуола лидерин таллыбыт

Оскуола лидерин таллыбыт

Быйылгы үөрэх сылыгар В.П. Ларионов аатынан Майа орто оскуолатын лидеринэн 10 «а» кылаас үөрэнээччитэ Александров Саша буолла.

Хас сыл аайы бары оскуолаларга оскуола общественнай олоҕун сүрүннүүр, оҕо тэрилтэтин салайар лидэр талыллар. Лидер оскуола иһинэн ыытыллар бары тэрээһиннэри көҕүлүүр, сүһүөхтэринэн арахсар оҕо тэрилтэлэрин салайар. Кини үөрэнээччилэр бүттүүн тумус туттар, холобур оҥостор, оскуола бастыҥ үөрэнээччитэ буолар.

Быйылгы үөрэх сылыгар В.П. Ларионов аатынан Майа орто оскуолатын  «Клуб Ларионовцы» оҕо тэрилтэтин лидеригэр уопсайа 7 кандидат турда. Куоластааһын ыытыллыан иннинэ  кандидаттар нэдиэлэ устата быыбар хампаанньаларынан үлэлээлээтилэр, кылаастары кэрийэн үлэлэрин торумун сырдаттылар. Күргүөмнээх үлэ түмүгүнэн, улахан сүһүөххэ кандидаттар «Дебаттар» тэрээһиҥҥэ түмсэн оскуола үөрэнээччилэрин кытта аһаҕас кэпсэтиигэ кытыннылар, ыйытыктарга хоруйдаатылар, былааннарын иһитиннэрдилэр. Кинилэр сүрүннээн быйылгы үөрэх сылыгар оскуолабыт Россиятааҕы үөрэнээччилэр хамсааһыннарыгар пилотнай оскуола буолбутунан «Информационнай-медийнэй», «Гражданскай көҕүлээһин», «Личнсть быһыытынан сайдыы», «Байыаннай-патриотическай» хайысхаларынан үлэлиир былааннаахтарын иһитиннэрдилэр, итиэннэ сүрүн болҕомто араас аһымал акцияларга уонна бырайыактарынан үлэҕэ уурулунна. Онон, быыбар иннинээҕи нэдиэлэ оскуолабыт лидери талыы үлэтинэн «оргуйан» олордо, радиоузелынан лидери сырдатыы, хампаанньалары иһитиннэрии биэриилэрэ үлэлээтэ. Быыбар долгутуулаах күнэ алтынньы 16 күнүгэр ыытылынна. Онно 5 – 11 кылаас үөрэнээччилэрэ уонна учууталлар кытыннылар. Кыайыылааҕынан 184 куолаһынан улахан сүһүөххэ 10 «а» кылаас үөрэнээччитэ Саша Александров, 96 куолаһынан орто сүһүөххэ 8 «в» кылаас үөрэнээччитэ Китаева Алина талылыннылар.

Оскуолабыт лидерин сүрэхтээһин тэрээһинэ алтынньы 17 күнүгэр ыытылынна. Бу күн оскуола дириэктэрэ Светлана Кимовна Игнатьева ааспыт үөрэх сылыгар бэриниилээхтик үлэлээбит «Түмэн» оҕо тэрилтэтин актвистарыгар (10 «а» кылаас үөрэнээччилэрэ) –  Антонов Андрейга, Андреев Арчыҥҥа, Шарин Сарыалга, Харитонов Аликка, Егорова Машаҕа, Павлова Айсенаҕа, Скрябина Марианнаҕа, Попов Павелга, Васильев Кириллга Саха Республикатын оҕо хамсааһынын сайдыытыгар көхтөөх үлэлэрин иһин Республикатааҕы оҕону эбии үөрэхтээһин киинин грамотатын туттарда. Быйылгы үөрэх сылыгар лидеринэн талыллыбыт Саша Александров уонна Алина Китаева лидер бэлиэтин ыллыллар уонна оскуола, үөрэнээччилэр тустарыгар бэриниилээхтик үлэлиэхпит диэн андаҕар тылын эттилэр. Бэлиэ тэрээһини «СМиД» уонна «Түмэн» оҕо тэрилтэтин активистарын уоттаах-күөстээх «флешмоб» үҥкүүлэрэ, гитаралаах ырыалара киэргэттэ. Бу күн ыҥырыылаах ыалдьыттарынан Майатааҕы лицей «Республика гимназия», Ф.Г. Охлопков аатынан Майа орто оскуолатын «Феникс» оҕо тэрилтэлэрин активистара буоллулар. Онон, үс оскуола бастыҥ үөрэнээччилэрэ биир түһүлгэҕэ мустан санаа атастаһыылаах, ырыалаах-үҥкүүлээх киэҥ хабааннаах тэрээһини ыыттылар.

Александров Саша, 10 «а»  кылаас үөрэнээчитэ, оскуола лидерэ:

-           Мин оскуолабар лидеринэн талыллыбыппыттан олус үөрдүм уонна долгуйдум. Лидер буолар –  олус улахан эппиэтинэс. Мин үөрэх, сиэр-майгы өттүнэн үөрэнээччилэргэ холобур буолуохтаахпын, үөрэнээччилэри билии-көрүү, сайдыы суолугар сирдиэхтээхпин. Оскуолабын киэҥ эйгэгэ чиэтээхтик көмүскүөхтээхпин, сырдатыахтаахпын.Биһиги оскуолабыт 777 үөрэнээччилээх улахан оскуола. Дириҥ, баай историялаах. Мин иннибинэ чаҕылхай дидердэр үлэлээн ааспыттара. Кинилэр суолларын батаммын таһаарыылаахтык үлэлиэм диэн эрэнэбин.

Антонов Андрей, 2015 – 16 үөрэх сылыгар оскуола лидерэ, 11 «а» кылаас үөрэнээччитэ:

-           Биһиги  бу тэрээһини олус күүппүпүт уонна кыһанан бэлэмнэммиппит.Тэрээһин олус долгутуулаахтык, үрдүк таһымнаахтык ааста. Онон, сыалбытын ситистибит дии саныыбын. Лидер сүрэхтэниитин тэрээһинигэр атын оскуолалар активтарын ыҥырбыппыт Майабыт оскуолалары түмэр дии саныыбын. Лидер диэн мин санаабар дьону түмэр, сатабыллаахтык салайан, ситиһиигэ тиэрдэр киһи буолуохтаах. Александров Саша лидер буолбутуттан олус үөрэбин, киниэххэ эрэнэбин. Сашаҕа Ларионвскай декадаҕа индивидуальнай урбаанньыт бириэмийэтин туттарбытым. Оҕо тэрилтэтин салайыы үөрэнээччигэ личность быһыытынан сайдарыгар олус элбэх кыаҕы биэрэр. Мин үлэлиир кэммэр «Саха сирин эдэр лидерэ» күрэххэ «Мастер дела», предпринимательство сылын чэрчитинэн «Человек года» анал ааттары ылбытым.

Алина Эверстова, Тася Григорьева

 

 

Просмотров: 174 | Добавил: mayaschool | Теги: Оскуола лидерин таллыбыт | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]