Главная » 2016 » Октябрь » 16 » Оскуолабытыгар «Кэскил» хаһыат күнэ
10:02
Оскуолабытыгар «Кэскил» хаһыат күнэ

Оскуолабытыгар «Кэскил» хаһыат күнэ

В.П. Ларионов аатынан Майа орто оскуолатыгар «Кэскил хаһыат – оҕо-аймах доҕоро» диэн сурутууну көҕүлүүр хаһыат күнэ ыытылынна. Нэдиэлэ устата оскуола радиоузелынан хаһыаты сырдатар, историятын кэпсиир, сурутууну көҕүлүүр биэриилэр үлэлээтилэр. «Мэҥэбил» эдкорпост үөрэнээччилэрэ оскуола көрүдүөрүгэр сурутууну көҕүлүүр плакаттары уруһуйдаан, суруйан ыйаатылар, «Кэскил» сыллааҕы таһаарыытын кэчигирэччи быыстапкалаатылар. Алтынньы 15 күнүгэр орто сүһүөхтэргэ аналлаах хаһыат күнэ ыытылынна. Бу күн үөрэнээччилэр хаһыат туһунан элбэҕи биллилэр-көрдүлэр. Оскуола библиотекаря Мария Хабарова уонна «Мэҥэбил»  эдкорпост салайааччыта Изабелла Романова хаһыат историятын, далааһыннаах үлэтин туһунан сырдаттылар.Ыҥырыылаах ыалдьытынан Саха республикатын үөрэҕэриитин туйгуна, Мэҥэ-Хаҥалас улууһун «Таммахтар» литературнай холбоһук салайааччыта Августина Семеновна Владимирова – Хабарова буолла. Кини «Мэҥэбил» эдкорпоһу тэрийэр, салайар өр сыллаах үлэтигэр «Кэскил» хаһыаты кытта үлэтин туһунан кэпсээтэ. Хаһыат оҕо үүнэригэр-сайдарыгар үктэл буоларын, киэҥ арыйыыларга кыах биэрэрин сырдатта. Мустубут үөрэнээччилэр «Кэскил» 80 сыллаах үбүлүөйдээх тэрээһинин туһунан презентацияны сэргээн көрдүлэр. Хаһыат ыытар тэрээһиннэрин, күрэхтэрин туһунан кэрэхсии иһиттилэр. Бэлиэ күнү Раися Скрябина, Прасковья Семенова салайааччылаах 3 «в» кылаас үөрэнээччилэрэ ылбаҕай ырыанан, Лидия Артемьева салайааччылаах 3 «а» кылаас үөрэнээччилэрэ «Туллуктар» үҥкүүнэн киэргэттилэр. «Мэҥэбил» эдкорпост үөрэнээччилэрэ Тася Григорьева, Айна Осипова, Макарий Скрябин «Кэскил» туһунан хоһоон ааҕан көрөөччүлэри биһирэттилэр.

Тэрээһин бэлиэ түгэнинэн «Кэскил» рубрикаларынан айан» диэн квест-оонньуу буолла. Кылаастар хамаандаларынан арахсан бириэмэҕэ хаһыат рубрикаларынан сорудахтары толорго күрэхтэстилэр: «Айыына» рубрикаҕа оҕуруо тистилэр, «Билим» - хаһыат историятын туһунан ыйытактарга хоруйдаатылар, «Уолан» - ойбонтон уулаатылар, «Уоскулаҥ» - логическай сорудахтары толордулар, «Кэрэ эйгэтэ» - ырыа ыллаатылар, «Сайдыс» - планшетка сорудахтардаах оонньууну толордулар. Оонньуу рубрикаларынан тохтобулларыгар учууталлар толоруу хаачыстыбатынан көрөн баал туруордулар, кинилэргэ «Түмэн» оҕо тэрилтэтин активистара көмөлөстүлэр. Көхтөөх күрэх түмүгүнэн, 5 – 6 кылаастарга I миэстэни – 6 «в» (сал. Дмитриева С.М), II м – 6 «б» (Тастыгина Е.Н), III м – 5 «в» (Новгородова М.Е); 7 – 8 кылаастарга I миэстэни 8 «б» кылаас  (Илларионова Н.Г), II м – 7 «а» (Давыдова О.Е), III м – 7 «б» (Петухова А.А.) ыллылар.  Күрэххэ хамаандалар бука бары олус көхтөөхтүк кытыннылар, «Кэскил» рубрикаларын туһунан элбэҕи биллилэр, интэриэһиргээтилэр.

Айна Осипова, 8 «б» кылаас үөрэнээччитэ:

-           Мин бүгүҥҥү тэрээһини олус сөбүлээтим. Бэйэм хаһыакка сурутуулаахпын, оҕо эрдэхпиттэн сөбүлээн ааҕабын. Квест-оонньуу рубрикалар ис хоһооннорун сырдатар. Холобура, хаһыаты аахпат оҕолор «Сайдыс» рубриканы ааҕыахтарын баҕаран дьиэлээтилэр, төрөппүттэригэр «Кэскилгэ» сурутуохха диэн этиэх буоллулар. Хаһыаты ааҕыы киһи кругозорун байытар, элбэҕи үөрэтэр суолталаах.

Бу күн Майатааҕы почта үлэһитэ кэлэн кылаастарынан чэпчэтиилээх сурутууну ыытта. Онно кылаастар, учууталлар бука бары көхтөөхтүк кытыннылар. Сурутууга оскуола иһинээҕи күрэхтэһии алтынньы 13 күнүгэр диэри ыытыллар.

Бу курдук, оҕо-аймах таптаан ааҕар хаһыата «Кэскил» оҕолору сырдыкка, билиигэ-көрүүгэ ыҥырар.

Августина Семеновна Хабарова-Владимирова:

Бүгүҥҥү тэрээһин олус үчүгэйдик, оҕолорго туһалаахтык ааста. Оҕолор олус көхтөхтүк кытыннылар. Оскуола салалтатын өттүттэн тэрээһиҥҥэ кыһаллан үрдүк таһымнаахтык ыыттылар. Үөрэнээччилэр «Кэскил» хаһыакка интэриэстээхтэрин бэлиэтээтии көрдүм. Билигин чэпчэтиилээх сурутуу ыытылла турарынан хаһыакка оҕолор суруйтарыахтарын наада. «Кэскили»  ааҕар оҕо олоҕу кытта тэҥҥэ хардылыыр, үүнэр-сайдар.

Тася Григорьева, 11 «б» кылаас үөрэнээччитэ

Просмотров: 186 | Добавил: mayaschool | Теги: Оскуолабытыгар «Кэскил» хаһыат күнэ | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]