Главная » 2017 » Май » 4 » Үөрэнээччилэрбит тус урбаанньыт буоллулар
20:42
Үөрэнээччилэрбит тус урбаанньыт буоллулар

Оскуолабыт үөрэнээччилэрэ тус урбаанньыт буоллулар

Аныгы сайдыылаах олох тэтиминэн, Дойдубут, Республикабыт, уопсастыбабыт олоҕун таһымын үрдэтиигэ биир сүрүн миэстэни урбаан (предпринимательство) ылар. Билиҥҥи олох ирдэбилинэн, күннэтэ араас эйгэҕэ үлэлиир урбаанньыт элбээн иһэр. Уопсастыба, салалта өттүттэн нэһилиэнньэ дьарыктаах буолуутун өйүүр анал программалар үлэлииллэр, араас күрэхтэр ыытыллаллар. Онуоха, В.П. Ларионов аатынан Майа орто оскуолата кэнчээри ыччаты урбаан эйгэтигэр таһаарыылаах үлэһит буолар ыччаты иитигэ ситимнээх үлэни ыытар. Ол курдук, оскуолабытыгар республикатааҕы бизнес-оскуоланы, Дьокуускайдааҕы бизнес-инкубаторы, Мэҥэ-Хаҥалас улууһун урбаанньыттарын ассоциациятын кытта ыкса үлэлэһэр бизнес-инкубатор тэриллибитэ үс сыл буолла. Ол чэрчитинэн, үөрэнээччилэр 1-10 кыл. сыл устата урбаан оҥкулун үөрэтэр чаастарга дьарыктанабыт. Оскуолаҕа урбаан сатабылын иҥэриигэ үөрэнээччилэргэ улуус, Республика таһымнаах күрэхтэр, олимпиадалар, научнай-практическай ааҕыылар ыытыллаллар. Үөрэнээччилэр араас хайысхалаах бизнес-бырайыактары олоххо киллэрэн Республика таһымнаах күрэхтэргэ ситиһиилээхтик кыттабыт. Ол түмүгүнэн, оскуолабыт үөрэнээччилэри хамнастааһыны, үлэлэтиини көрөр Калужскай уобаласка ыытыллыбыт Бүтүн Россиятааҕы А.С. Макаренко аатынан норуоттар икки ардыларынааҕы күрэххэ кыайыылаах үрдүк аатын ылла. Билигин уопсайа 21 үөрэнээччи бизнес-бырайыактаах, онтон 3 үөрэнээччи тус урбаанньыт быһыытынан регистрацияланан күн бүгүнүгэр диэри таһаарыылаахтык үлэлииллэр. Кинилэри кытта урбаанньыт буолар хайдаҕын-тугун туһунан туоһулаһарга сананным:

Захарова Варя, 8-с кылаас үөрэнээччитэ:

- Мин быйылгы үөрэх сылыгар анал регистрацияны ааһан тус урбаанньыт буоллум. Оскуолам өйөөн тэриммит «Сублимационнай өҥө» диэн бырайыакпынан футболкаҕа, чааскыга, араас сувенирдарга термопресс диэн тэрилинэн ойуу, сурук-бичик түһэрэбин. Ыйдааҕы барыһым сакаас хайдах киирэриттэн тутулуктаах, холобур, бу ыйга 4000 солкуобай киллэрдим. Футболкаҕа А4 кээмэйдээх ойуу түһэрэр буоллахпына, төлөбүрэ – 250 солкуобай, өскөтүн сакаастааччы футболката суох буоллаҕына – 500 солкуобай. Билиҥҥи кэмҥэ оҕолор тус урбаанньыт буоларбыт олус тоҕоостоох дии саныыбын, төрөппүттэргиттэн мээнэ харчы көрдөөбөккүн уонна үлэлии үөрэнэҕин.

Сыроватская Даяна, 8 «а» кылаас үөрэнээччитэ:

- Мин оҕо эрдэхпиттэн араас сувенирдары оҥорорбун олус сөбүлүүбүн. Быйылгы үөрэх сылыгар «Лазернай-гравировкалыыр аппараатынан сувенирдары оҥоруу» диэн бырайыгынан оскуолам өйөбүлүнэн тус урбаанньыт буоллум. Дьон үксүн бэлиэ күннэргэ аналлаах араас суруктаах топпердары сакаастыыллар. Ону оҥорорбор бастаан компьютерга сурук эскиһин оҥоробун уонна аппаратынан фанера маска быһан таһаарабын. Уолаттар билиҥҥи кэмҥэ муода буолбут моойго иилинэр мас оһуордаах бабочкалары сакаастыыллар. Топпер сыаната 200 солкуобайтан саҕаланар, кээмэйиттэн көрөн сыана үрдүөн сөп. Ыйга 20 топпер оҥороммут 4000 солк киллэрдим. Быйыл республикатааҕы бизнес-бырайыак күрэҕэр кыттаммын I степеннээх диплом ылбытым. Тус урбаанньыт буолар киһи сайдарыгар, билиитэ-көрүүтэ хаҥыырыгар, үбү-харчыны суоттана үөрэнэригэр олус туһалаах дии саныыбын.

Федорова Айсена, 8 «б» кылаас үөрэнээччитэ:

- Мин кыра сааспыттан ийэбинээн минньигэс бурдук аһын сөбүлээн оҥоробун. Бу сыл кулун тутар ыйыттан саҕалаан «Бурдук аһын оҥорон атыылыыр өҥө» диэн бизнес-бырайыак суруйаммын тус урбаанньыт буоллум. Онон, оҕо сааһым ыра санаата туолбутуттан олус үөрэбин. Билигин дьүккүөрдээхтик үлэлээммин дьыалам сайдарын, чэчириирин ситиһиэхтээхпин. Саҕалааһыҥҥа баахыла, круасан, пончик, бичиэнньэ буһаран атыылыы сылдьабын. Холобур, баахыла сыаната – 25 солкуобай, күннээҕи ыраас барыһым 300 солк. буолар. Тус урбаанньыт буолан, сүрэҕэлдьээбэккэ үлэлииргэ, дьиэ кэргэним үбүгэр-харчытыгар көмөһөргө үөрэнэбин. Сайыҥҥы сынньалаҥ кэмигэр ыһыахтары кэрийэн атыылыыр баҕа санаалаахпын.

 

Тася Григорьева, В.П. Ларионов аатынан

Майа орто оскуолатын 11 кылааһын үөрэнээччитэ

«Мэҥэбил» эдкорпост.

Просмотров: 39 | Добавил: mayaschool | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]