Главная » 2019 » Октябрь » 16 » Россиятааҕы экологическай фестивальга кыайыылаах
15:24
Россиятааҕы экологическай фестивальга кыайыылаах

Академик В. П. Ларионов аатынан Майа орто оскуолатын үөрэнээччилэрэ Бүтүн Арассыыйатааҕы «Земле жить» экологическай бэстибээлгэ ситиһиилээхтик кыттан кэллилэр. Киэҥ хабааннаах тэрээһин Москва куоракка алтынньы 8 – 12 күннэригэр ыытылынна, Дойду 45 эрэгийиэниттэн уопсайа 250 кыттааччы муһунна. Кинилэр ортолоругар «Юннат» бүтүн Арассыыйатааҕы куоҥкурус финалистара, «Летопись юннатских дел» дойду таһымнаах ахсыйа кыайыылаахтара, юннат хамсааһынын бэтэрээннэрэ, естественнэй-научнай хайысха эбии үөрэхтээһинин педагогтара уонна дойду үөрэнээччилэр хамсааһыннарын активистара. Бу улахан тэрээһиҥҥэ Бүтүн Арассыыйатааҕы «Юннат» күрэх финалистара—В.П. Ларионов аатынан Майа орто оскуолатын үөрэнээччилэрэ – Роберт Баишев, Павел Исаков, Юлия Кириллина, Лена Сидорова кыайыылаах дипломунан наҕараадаланнылар. 8 «б» кылаас үөрэнээччитэ Юля Кириллина «Мин талар идэм» сиэксийэҕэ «Тыа сирин усулуобуйатыгар барыга барсар саҥа идэ» дакылаатынан кыттан III бириистээх миэстэни ылла. Үөрэнээччилэри биология учуутала Анна Евсеева салайан илдьэ сырытта.

Эдэр чинчийээччилэр «Мин талар идэм», «Хонуу культуратын үүннэрии», «Оҕуруот аһа», «Сибэккини үүннэрии», «Ладшафтнай дизайн», «Эмтээх үүнээйилэр», «Кэтэх уонна мүөттээх ыҥырыалары иитэр хаһаайыстыба», «Аныгы үөрэхтээһин эйгэтигэр үөрэнээччилэр үлэлиир холбоһуктара», «Күөх технологиялар уонна стартаптар», «Инженерия, автоматизация уонна робототехника» хайысхаларга бырайыактары көмүскээтилэр.

Бэстибээл кыттыылаахтара М.В. Ломоносов аатынан Москватааҕы Судаарыстыбыннай университет ботаническай саадыгар, Москватааҕы оҕо айымньытын дыбарыаһыгар ыытыллыбыт араас хабааннаах үөрэтэр маастар-кылаастарга, айар мастерскойдарга сырыттылар, «Көмүс күһүн» Арассыыйатааҕы агро-оҥорон таһаарыы быыстапкатыгар кытыннылар .

Үрдүк таһымнаах күрэхтэн кыайыы кынаттанан кэлбит Юлия Кириллина тэрээһин туһунан санаатын бу курдук үллэстэр:

  • Бу дакылаатынан үлэлэспитим сыл аҥара буолла. Үлэм сүрүн ис хоһооно – дикоростартан бородууксуйа оҥорон таһаарар саҥа идэни арыйыы буолар. Чинчийэн, үөрэтэн көрөн баран, үүнээйи бу көрүҥүттэн бородууксуйа оҥорон таһаарар идэ суох эбит диэн түмүккэ кэллим. Маныаха сөп түбэһэр идэ – технолог. Ол эрээри үөрэҕи бүтэрбит технолог эт-үүт бородууксуйатынан дьарыктанар. Онон дикоростары чинчийиигэ, бородууксуйа оҥорууга исписэлиистэр наадалар. Биһиги оскуолабыт агро хайысхалаах уонна бизнес-инкубатордаах. Онон сайыҥҥы кэмҥэ үөрэнээччилэр кылааһынан дөлүһүөн хомуйан оскуолабыт эмтээх отунан дьарыктанар фито-барыгар туттарабыт. Куурдан-хатаран, ыраастаан баран утах оҥостон оскуолабыт остолобуойугар күһүн уонна саас 10 күн устата иһэбит. Бу дьаҥтан-дьаһахтан харыстаныы буолар. Дакылааппын дьүүллүүр сүбэ уонна кыттааччылар олус биһирээн үрдүктүк сыаналаатылар. Фестивальга кыттан олус элбэҕи биллим, атын омук оҕолорун кытта билистим, доҕордостум. Салайааччыларбар Роза Петровна Васильеваҕа уонна Прасковья Афанасьевна Харитоноваҕа махталбын тиэрдэбин.

Бу курдук, кэнчээри ыччаттарбыт киэҥ хабааннаах ситиһиилэрэ саха норуотун сарсыҥҥытын салайсыыга биир үктэл буолуо диэн бигэ эрэллээхпит.

Просмотров: 27 | Добавил: mayaschool | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]