Главная » 2017 » Апрель » 12 » «Салют талантов» норуоттар икки ардыларынааҕы фестиваль
06:57
«Салют талантов» норуоттар икки ардыларынааҕы фестиваль

Санкт-Петербург куоракка ыытыллыбыт «Салют талантов» норуоттар икки ардыларынааҕы үҥкүү уонна театр фестивалыгар оскуолабыт «Тускул» үҥкүү ансаамбылын 5 «б» кылааһын коллектива I степеннээх лауреат үрдүк аатын ылары ситистилэр (худ салайааччы Артемьева Л.И., кыл салайааччыта Варламова А.П, Борисов Никандр Леонидович), норуоттар икки ардыларынааҕы ырыа күрэҕэр 8 «а» кылаас коллектива Лауреат I степени (кыл. Сал. Харитонова П.А.).

Сааскы каникулу туһалаахтык

Сааскы каникул кэмигэр кылааһынан Санкт-Петербург куоракка ыытыллыбыт «Салют Талантов. Музыка» диэн норуоттар икки ардыларынааҕы күрэххэ кытынныбыт. Бу күрэххэ Дойдубут араас муннугуттан, Казахстантан, Киргизияттан олус элбэх араас омук оҕолоро муһуннулар. Биһиги кылааһынан «Оһуохай» уонна «Саргылардаах сахаларбыт» ырыаны толорон I степеннээх Лауреат буолан олус үөрдүбүт. Атын омук оҕолоро ырыабытын, таҥаспытын-саппытын олус кэрэхсээтилэр. Бииргэ үөрэнэр дьүөгэм Игнатьева Дайаана «Удаҕан» үҥкүүтүн олус имигэстик толорон II степеннээх Лауреат буолла.

Ыраах сиргэ тиийбиччэ, куонкуруһунан эрэ муҥурдаммакка, Санкт-Петербург куоракка баар үөрэх тэрилтэлэрин уонна кэрэ-бэлиэ сирдэри көрдүбүт-иһиттибит. Ол курдук, Санкт-Петербурдааҕы технология уонна дизайн уонна А.И. Герцен аатынан государственнай университеттарга сырыттыбыт. Манна биһиэхэ идэ арааһын, бу куоракка үөрэнэр хайдаҕын сиһилии кэпсээтилэр. Холобур, уруһуйдуур, айар-тутар талааннаах оҕолор төһө баҕарар бу университетка туттарсан идэ ылыахтарын сөп эбит дии санаатым. Онон, инникитин бу хайысхаларынан үөрэниэн баҕалаах оҕолорбут чопчу сыал-сорук туруорунан, билиилэрэ кэҥээн, санаалара кынаттанан кэллилэр.

Петребурга барыам иннинэ үгүс дьонтон бу куорат олус кэрэтин, кыраһыабай көстүүлээх дьиэлэрдээҕин туһунан истэр этим. Кырдьыга да, олус да ураты куорат эбит диэн илэ көрөн баран өссө ордук кэрэхсээн, сөҕөн-махтайан кэллим. Биһиги хас да күн устата Эрмитажка, Пушкин лицейигэр, «Царскай селоҕа», «Петродворецка» сырыттыбыт. Эрмитажка киирэн баран остуоруйа дыбарыаһыгар сылдьар курдук сананным. Музей ис өттө барыта көмүс солотуулаах оһуордарынан, хаймыыларынан киэргэтиллибит. Мин ордук хартыыналары сэргии көрдүм. Бу музейга араас үйэ кэминээҕи биллиилээх худуоһунньуктар хартыыналара барыта түмүллүбүт. Кырдьыга да, исскуство бу көрүҥүн баай нэһилиэстибэтэ күн бүгүнүгэр диэри үчүгэйдик ууруллан, бар дьон кэрэхсэбилин ыла турара Дойдубутугар култуура сайдыытыгар сүҥкэн оруоллаах дии санаатым. Ол курдук, мин Леонардо да Винчи, Рафаэль, Микеланджело, Тициан, Рембрандт, Рубенс, Ренуар, Сезанн, Моне, Ван Гог, Матисс, Гоген биллиилээх худуоһунньуктар хартыыналарын илэ харахпынан көрбүппүттэн олус долгуйдум уонна үөрдүм.

Петербург дьиэлэрэ барыта биир истииллээхтэрэ куораты өссө тупсарар дии санаатым. Ол курдук «Старый город» өттүгэр үксэ иккилии-үстүү этээстээх дьиэлэр, үрдүк, аныгы дьиэлэр атын сиргэ тутуллубуттар. Аны туран, куорат саамай кыраһыабай бэлиэ сиринэн Нева өрүс буолар эбит дии санаатым.

Онон, кылаас салайааччыбар Прасковья Афанасьевна Хартиноваҕа, салайааччыбытыгар Скрябина Раиса Александровнаҕа биһиэхэ – оҕолорго олохпут тухары умнуллубат элбэххэ үөрэтэр үтүө күннэри бэлэхтээбиттэригэр махтанабын.

Лена Сидорова, 8 «а» кылаас үөрэнээччитэ,

«Мэҥэбил» экорпост

Просмотров: 61 | Добавил: mayaschool | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]