Главная » 2019 » Сентябрь » 15 » Сиэрпэ уонна өтүйэ доҕордоһуута
21:46
Сиэрпэ уонна өтүйэ доҕордоһуута

Промышленнай Алдан уонна тыа хаһаайыстыбатын сүрүннүүр Мэҥэ-Хаҥалас улуустарын «көмүстээҕэр күндү» - үйэ аҥардаах доҕордоһуута үлэ, сомоҕолоһуу үрдүк күүһүн туоһулуур. «Сиэрпэ уонна муолат» бэлиэлээх чиҥ доҕордоһуу икки улуус сэргэстэһэн үлэлииллэригэр, бары эйгэҕэ уопут атастаһан сайдалларыгар сүҥкэн суолталаах.

Ааспыт сылга улууспут дэлэгээссийэтэ Алдан куоратын кыһыны атаары тэрээһинигэр ыалдыттаан, ырыалаах-тойуктаах кэнсиэр бастыҥын көрдөрөн, улуус олоҕун-дьаһаҕын сырдатан кэлбитэ. Онуоха харда биэрэн, балаҕан ыйын 5 күнүгэр Алданнааҕы үөрэх Департаменын начаалынньыга Елена Хрущ салайааччылаах үөрэхтээһин тиһигин үлэһиттэрин 45 киһилээх дэлэгээссийэтэ улууска оҕону үөрэтии-иитии үлэтин көрө-истэ тимир суол устун буойаһынан айаннатан кэллилэр. Ыалдьыттары Аллараа Бэстээххэ улуус баһылыгын социальнай боппуруостарга солбуйааччы Николай Цыпандин, үөрэх салалтатын начаалынньыга Ирина Черкашина көрүстүлэр. Саха сиэринэн, Алданнары Олоҥхо дьиэтигэр кымыһынан күндүлээтилэр, алаадьынан айах туттулар, алгыһынан арчылаатылар.

Алдан педагогтара Майа сэлиэнньэтигэр Р.Г. Васильев аатынан кыраайы үөрэтэр музейга, В.П. Ларионов, Ф.Г. Охлопков аатынан Майа орто оскуолаларыгар, «Кэнчээри» оҕону сайыннарар уонна үөрэтэр-оҥорон таһаарар кииннэргэ ыалдьыттаатылар. Маны сэргэ, Аллараа Бэстээххэ транспортнай техникум, В.Н. Оконешников аатынан Павловскай орто оскуолатын, «Мичээр» оҕону сайыннарыы киинин, Ороссолуодатааҕы «Күнчээн» оҕо уһуйаанын үлэтин көрдүлэр-иһиттилэр, улуустааҕы үөрэхтээһин музейыгар кэрэхсээтилэр.

Дэлэгээссийэ сырыытын биир сүрүн сыалынан агро-хайысхалаах, политехническэй, биисинэс-инкубатордаах В.П. Ларионов аатынан Майа орто оскуолатын айымньылаах үлэтин иҥэн-тоҥон билсии буолла. Ыҥырыылаах ыалдьыттар оскуола дириэктэрэ Светлана Игнатьеваны кытта ситиһиилээх үөрэнээччини иитэн таһаарыы боппуруостарын, улахан оскуола олоҕун-дьаһаҕын, үлэтин туһунан атах тэпсэн олорон сиһилии сэһэргэстилэр. Учууталлар оҥорбут үөрэх босуобуйаларын, үөрэнээччилэр араас хайысхалаах биисинэс-бырайыактарын, лааҕырдар, куруһуоктар, оҕо общественнай тэрилтэтин үлэтин, оскуола типографиятын сэргээтилэр, эмтээх отунан дьарыктанар фито-бар утаҕын амсайдылар, тупсаҕай оҥоһуулаах киэҥ-куоҥ кабинеттары көрдүлэр. Учууталлар уонна үөрэнээччилэр доҕордуу дэлэгээссийэҕэ ыллыам ырыалаах, хомоҕой хоһоонноох, үҥкүүлээх-битиилээх сэргэх кэнсиэри бэлэх ууннулар.

Мэҥэ сиригэр быйылгы сырыы туһунан ыалдьыттар санааларын бу курдук үллэстэллэр:

Елена Хрущ, Алданнааҕы үөрэх Департаменын начаалынньыга:

- Биһиги доҕордоһуубут Алдан оройуонугар республика прмышленноһа төрүттэниэҕиттэн саҕаламмыта. Онтон ыла ситимин быспакка үгүс көлүөнэ ыччата, дьоно-сэргэтэ алтыһан, кэккэ үлэлээн сайдан бу күҥҥэ кэллилэр. Мин Мэҥэ-Хаҥалас улууһун салалтатыгар, үөрэх салалтатын начаалынньыгар Ирина Васильевна Черкашинаҕа, улуус олохтоохторугар истиҥник-иһирэхтик көрсүбүккүт иһин махталбын тиэрдэбин. Улуус бары оскуолалара, уһуйааннара олоҕу кытта тэҥҥэ тэтимнээхтик үлэлии олороллоро тута

көстөр. В.П. Ларионов аатынан Майа орто оскуолата олус айымньылаахтык үлэлиирин истэр этим, бүгүн илэ харахпынан көрөн үөрдүм. Оскуола түргэн тэтимнээх олоҕу кытта тэбис-тэҥҥэ сайдан иһэрэ ситиһиитин оҥкула буолар дии саныыбын. Үөрэнээччилэр – олус аһаҕастар, тус көҕүлээһиннээхтэр, аныгы олох ыччаттара! Оскуола иһинэн оҥорон таһаарар араас бырайыактар, тэриллэр үгүстэрин киһи кэрэхсии көрөр!

Разия Улыбина, гимназия дириэктэрэ, Аллараа Кураанах сэл:

- Икки улуус доҕордоһуубут 51 сылын туолбутуттан киэн тутта, астына саныыбыт. Сыллата ситиһиибитинэн, саҥа арыйыыларбытынан уопут атастаһарбыт оҕо кэллэктииптэрин сайдыытын көҕүлүүрүн таһынан улуустарбыт социальнай-экэнэмиичесэй кыахтарын хамсааһыныгар төһүү күүс буолар. Биһиги манна үөрэ-көтө, дуоһуйа-астына кэлэбит. Мин бугун В.П. Ларионов аатынан Майа оро оскуолатын үлэтин үрдүк таһымыттан сөхтүм уонна үөрдүм. Оскуола үлэтин бары хайысхалара дойду таһымыгар тахсыбыттар, ситиһиилээхтик үлэлииллэр. Үөрэнээччилэрэ олус сайдыылаахтар, киэҥ көрүүлээхтэр. Маладьыастар! Улуус бары олохтоохторугар сылаастык көрсүбүккүт иһин махталбытын тиэрдэбит!

Бу курдук, Алдан улууһун дэлэгээссийэтэ улууспутугар ыалдьыттаан, өрө көтөҕүллүүлээхтик көрсүһэн, уопут атастаһан, «Сиэрпэ уонна өтүйэ доҕордоһуута» өссө чиҥээтэ!

Просмотров: 25 | Добавил: mayaschool | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]