Главная » 2019 » Октябрь » 7 » Судаарыстыбыннас күнэ
10:51
Судаарыстыбыннас күнэ

В.П. Ларионов аатынан Майа орто оскуолатыгар Судаарыстыбыннас күнэ

Саха  республикатын Судаарыстыбыннаһын күнэ В.П. Ларионов аатынан Майа орто оскуолатыгар үрдүк таһымнаахтык бэлиэтэннэ.

Бу дириҥ суолтаталаах күнү уруйдуур үөрүүлээх линейка ыҥырыылаах ыалдьыттарынан Мэҥэ-Хаҥалас улууһун депутаттарын сэбиэтин бэрэссэдээтэлэ Павел Данилович Сазонов, үөрэх салалтатын начаалынньыга Ирина Васильевна Черкашина буоллулар. Ытыктанар ыалдьыттар мустубут бар дьону бэлиэ күнүнэн эҕэрдэлээн туран, үөрэнээччилэргэ төрөөбүт дойдубутугар судаарыстыбыннас күнүн суолтатын, историятын кэпсээтилэр. Бэлиэ күнү айхаллаан сахалыы сиэдэрэйдик таҥныбыт-симэммит 10-с кылаас үөрэнээччилэрэ хомуска оонньоон дьүрүһүттүлэр, эрчимнээх 11 кылаас уолаттара сахалыы хомоҕой хоһоон этэн дуораһыттылар, саха былааҕа тутуурдаах алын кылаас үөрэнээччилэрэ республика, оскуола гиимнэрин ыллаан дьиэрэһиттилэр. Үөрүүлээх линейка сүрүн түгэнинэн Саха норуота тумус туттар киһибит, бастакы академикпыт – В.П. Ларионов сырдык мөссүөнүн туоһулуур бюстка венок ууруута буолла.

Бу күн Саха республикатыгар Судаарыстыбыннас күнүгэр сөп түбэһиннэрэн оскуола президенин быыбара ыытылынна. Хандьытааттар - 10 "а" кылаас үөрэнээччитэ Маша Баишева уонна 10 "б" кылаас үөрэнээччитэ Настя Петрова ый устата тус үлэлэрин торумун үөрэнээччилэргэ, учууталларга кылаас чаастарыгар көхтөөхтүк билиһиннэрдилэр, сиһилии сырдаттылар.
Маша Баишева - туйгун үөрэнээччи, спордунан утумнаахтык дьарыктанан оскуола чиэһин республикатааҕы, улуустааҕы күрэхтэргэ үрдүк таһымнаахтык көмүскүүр, научнай-чинчийэр үлэлэрэ үтүө түмүктээхтэр.
Настя Кириллина - туйгун үөрэнээччи, араас бырайыактарга, күрэхтэргэ ситиһиилээхтик кыттар, уруһуйдуур, музыкальнай инструменнарга оонньуур, оскуола чиэһин араас күрэхтэргэ үрдүк таһымнаахтык көмүскүүр. Куоластааһыҥҥа учууталлыын, үөрэнээччилиин бука бары көхтөөхтүк кытыннылар.

Маны сэргэ, бу күн суолатын үөрэтэр кылаас чаастара, уруоктар, хомус флеш-муоба тэтимнээхтик ыытылынна, радио-биэрии үлэлээтэ.

            Түмүккэ, кэнчээри ыччаттарбыт маннык хабааннаах тэрээһиннэргэ кыттан дойдуларыгар бэриниилээх, махталлаах, дьиҥ патриот дьон буола үүнэн-сайдан тахсыахтара диэн эрэнэбит.

Изабелла Романова,

 «Мэҥэбил» эдэр кэрэспэндьиэннэр постарын салайааччыта.

 

 

 

           

 

Просмотров: 8 | Добавил: mayaschool | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]