Главная » 2017 » Май » 9 » Тыыннаах музыка аргыстаах
21:01
Тыыннаах музыка аргыстаах

«Уоттаах кынаттар»

«Уоттаах кынаттар» ВИА уолаттарын тыыннаах музыка доҕуһуоллаах эрчимнээх ырыалара В.П. Ларионов аатынан Майа орто оскуолатын бары тэрээһиннэрин мэлдьи киэргэтэр. Дохсун ытыс тыаһа аргыстаах, тыыннаах музыка эйгэтигэр үөрэнээччилэри бүттүүн сомоҕолообут, оскуолабыт «Сулустарын» - «Уоттаах кынаттар» ВИА хомпоруун хотойдорун туһунан сырдатарга, кинилэри кытта атах тэпсэн олорон тыыннаах музыка алыптаах эйгэтин туһунан сэһэргэһэргэ сананным. Уолаттар быйыл оскуоланы бүтэрэн, олох киэҥ аартыгар үктэнээри кынаттарын куурда-хатара сылдьаллар. Кинилэр бука бары биир бөлөххө айа-тута, ыллыы-туойа сылдьалларын таһынан, кыра саастарыттан уу тэстибэт ыкса доҕордуулар. Павел Попов - бөлөх салайааччыта, барабаҥҥа оонньуур, Кирилл Васильев – солист, тэтим-гитараҕа оонньуур, Эллэй Васильев – гитарист, Женя Куличкин – бас гитарист, Арчын Андреев – клавишник, синтезаторга оонньуур.

Бөлөххүт хайдах тэриллибитэй?

- Үгүспүт бу ВИА-ҕа 5-с кылаастан дьарыктанабыт. Ол эрээри бөлөх быһыытынан ылсан 9-с кылаастан оонньуубут. Билигин салайааччыта суох баҕа өттүнэн түмсэн ыллыыбыт. Оскуолабыт музыка уруогун учуутала Светлана Аркадьевна Борисова биһигини продьюсер курдук өйүүр, күрэхтэргэ, кэнсиэрдэргэ кыттарбытын ыйан-кэрдэн биэрэр. Аан бастаан ВИА-ҕа уһуйбут учууталбытынан «Хардыы» бөлөх соло-гитариһа Иван Эдуардович Местников уонна сүбэлээн-амалаан биэрбит «Ый Суола» бөлөх ударнига Алексей Ефимов буолаллар.

Бөлөххүт аата туох суолталааҕый, хайдах талбыккытый?

  • Аат толкуйдуур олус уустук эбит. «Уоттаах кынаттар» диэн «ыраахха, үрдүккэ көтөр» диэн айар үлэбит алгыстаах буоллун диэн бары бииргэ толкуйдаабыппыт. Дьиҥэ, бу ааты күрэххэ кыттарбыт саҕана ыксалынан талбыппыт, ол эрээри бары олус сөбүлээтибит.

Репертуаргыт туһунан сырдаххыт дуо?

  • Сүрэхпит сөбүлүүр ырыаларын толоробут. Звери бөлөх «Районы, Кварталы», «Пока», Дима Билан «Люби меня», Green day «Boulevard of broken dreams», Good Charlotte «Emotionless», Игорь Егоров «Билбэтэҕим», Breakout «Санаам барыта эн».

Бэйэҕит ырыа суруйарга холонон көрөҕүт дуо?

  • Холонуохпутун баҕарабыт, кыра саҕалааһыннар да бааллар. Ол эрээри сөп түбэһэр матыып, тыл айар иэйииттэн, түгэнтэн тутулуктаах. Онон инникитин айар үлэбит сайдан, тупсан иһиэ, ырыа да суруллуо диэн бигэ эрэллээхпит.

Музыкальнай инструмеҥҥа хаһааҥҥыттан оонньуур буолбуккутуй?

Кирилл Васильев:

  • Мин сэттэ сыл музыкальнай оскуолаҕа скрипка кылааһыгар үөрэммитим. Онон оҕо эрдэхпиттэн музыканы сөбүлүүбүн. Оскуолаҕа киирэрим саҕана ийэм гитаратын ылан оонньуу сатыыр этим. Онтон кэлин оонньуур дьонтон ыйыталаһан үөрэммитим.

Арчын Андреев:

-Музыка - мин олоҕум аргыһа буолар. Кыра сааспыттан 5 сыл музыкальнай оскуолаҕа фортепиано кылааһыгар үөрэммитим. Ол билиибин билигин бөлөххө оонньоон хаҥата, сайыннара сылдьарбыттан олус үөрэбин.

Эллэй Васильев:

- Гитараҕа оонньуурга бэйэм баҕа өттүбүнэн интернеттэн көрөн уонна доҕотторбуттан ыйыталаһан үөрэммитим. Мин санаабар, ханнык баҕарар инструмеҥҥа оонньуу үөрэнэргэ баҕа, күннэтэ дьарыктанар дьүккүөрдээх үлэ уонна музыка тэтимин табар дьоҕур наада. Онон баҕалаах киһи кыһалыннаҕына үөрэниэн син.

Павел Попов:

- Бэһис кылааска үөрэнэ сырыттахпына аҕам Иван Местниковка киллэрэ сылдьыбыта. Бэйэм ис дууһабыттан барабаҥҥа оонньуохпун баҕарбытым. Барабан музыкаҕа тэтими биэрэр, күүһүдэр. Учууталым барабаҥҥа оонньооһун оҥкулугар үөрэппитэ. Онтон ыла күннэтэ доҕотторбун кытары дьарыктанаммын сайдарга-тупсарга дьулуһабын.

Аан бастаан сыанаҕа тахсыбыт түгэҥҥитин өйдүүгүт дуо?

Женя Куличкин:

  • Бөлөх быһыытынан утумнаахтык дьарыктанан саҕалыырбытыгар оскуолабытын ыытар тэрээһиннэригэр көтүппэккэ кыттарбыт. Аан бастакыбытын элбэх дьон иннигэр кыайыы күнүгэр ыллаабыппыт. Тыһыынчанан дьон иннигэр ыллыыр долгутуулаах бөҕө буоллаҕа дии! Төрөппүттэрбит көрө кэлбиттэрэ, онон икки бүк эппиэтинэстээх курдуга. Өр да өр бэлэмнэммит ыра санаабыт туолан, дьон-сэргэ астыммытын көрөн атахпыт сири билбэт буолуор диэри үөрбүппүт. Онтон «Сааскы тэтим» диэн республикатааҕы куонкуруска кыттан Лауреат буолан өссө дьолломуппут.

Бөлөх буолар туох уратылааҕый, уустуктааҕый?

  • Саамай сүрүнэ – доҕордуу буолуохха уонна бэйэ-бэйэҕэ үөрэнэн ситимнээхтик ыллыахха, инструмеҥҥа оонньуохха уонна музыканы ис дууһаҕыттан таптыыр «фанат» буолуоххун наада. Оччоҕуна эрэ ыһыллан хаалбакка утумнаахтык дьарыктанаҕын, айар үлэҥ туох эмит ситиһиилэнэр. ВИА-ны түмэргэ инструмеҥҥа музыканы бэйэтэ төһө баҕарар таһааран оонньооччуну булуу буолар. Үгүстэр үөрэппит биир ырыаларын эрэ ноталарынан оонньууллар, музыканы тута таһааралларын ыарырҕаталлар.

Инникитин туох былааннааххытый?

- Оскуолабытын бүтэрэн баҕарар үөрэхпитигэр туттарсан дьоммутугар, норуоппутугар туһалаах үлэһиттэр буолуохпутун баҕарабыт. Оҕо сааспыт аргыһын - тапталлаах оскуолабыт аатын өрүү үтүө өттүнэн ааттатар эрэллээхпит. Уонна ханна баҕар сырыттарбыт айар үлэбитин өссө сайыннарар ыра санаалаахпыт.

Андрей Антонов, В.П. ларионов аатынан

Майа орто оскуолатын XI кылааһын үөрэнээччитэ,

«Мэҥэбил» эдкорпост.

Просмотров: 72 | Добавил: mayaschool | Рейтинг: 5.0/1
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]