Главная » 2015 » Май » 10 » Тыыннаахтар умнубат сыллара
21:37
Тыыннаахтар умнубат сыллара

Ыам ыйын 9 күнэ – Россияҕа уонна атын тас дойдуларга сыл ахсын бэлиэтэнэр улуу бырааһынньык күнэ. Улуу Кыайыы күнэ. Оруобуна 70 сыл анараа өттүгэр Аҕа дойду Улуу сэриитигэр биһиги үгүс норуоттаах дойдубут кыайыыны ситиспитэ. Ол кыайыы – биһиги бүгүҥҥү олохпут инникитин, кэскилин түстээбитэ. Билигин биһиги ыраас халлаан анныгар дьоллоохтук, эйэлээхтик олорорбут – кинилэр оччотооҕу кэмҥэ турууласпыт, ситиспит өҥөлөрө. Мэҥэ-Хаҥалас улууһун үрдүнэн сэрииттэн эргиллэн кэлбит бүгүн күн 4 эрэ бэтэрээммит олорон кэлээхтээтэ: Иванов Иван Николаевич, Осипов Прокопий Иванович, Прокопьев Василий Тихонович, Черкашин Николай Дмитриевич. Кинилэр бу сэрии уоттаах хонуутугар кыргыһан, дьылхааннаах сыллары аһаран кэлбит улуу дьон.

Биһиги оскуолабытыгар бу үөрэх сыла Улуу кыайыы 70 сылын чэрчитинэн элбэх тэрээһиннээх ааста. Үөрэнээччилэр, учууталлар, үлэһиттэр сылы быһа үлэлээбит үлэбит үрдүк көрдөрүүтүнэн оскуола барыта сүүс бырыһыан байыаннай таҥастаах, сэрии тиэмэтигэр араас киэргэллээх, атрибуттаах, сэрии саҕана Курскай дуга диэн ааттаах танковай кыргыһыы экспозициялаах кыттыыбыт буолар. Бу экспозиция туруорулларын туһугар анаан хас да кылаас уолаттарын бэлэмнээн, хас биирдии кылаас танка, сэрии сэбиргэлэ оҥорон оскуола бары сыратын уурдубут. Кыайыы парадын иннинэ оскуола бары үөрэнээччилэрин кыттыылаах улахан тэрээһиннэр буолан аастылар: бэтэрээннэри чиэстээһин, «Песни Победы» диэн кылаастар икки ардыларыгар ыытыллар үгэс буолбут байыаннай-патриотическай ырыа күрэҕэ,«Сүгүрүйэбит, Улуу Кыайыы саллаатыгар»диэн ааҕыылар, строй уонна ырыа көрүүтэ,уопсай хаартыскаҕа түһүү о.д.а. Уопсайынан ылан көрдөххө, сыл устата Кыайыы 70 сылыгар анаммытманнык тэрээһиннэр ыытылыннылар: «Салют, победа!» диэн бырайыак үлэлээтэ, 70 отонноох маһы үүннэрии, сэрии бэтэрээнэ И.П. Иванову кытта көрсүһүү, «Святые матери» диэн чинчийэр бырайыак (Өрөспүүбүлүкэ үрдүнэн «Архивная работа», “Лучшая поисковая экспедиция школьников РС(Я)” – 1 миэстэ), история нэдиэлэтин чэрчитинэн “История ВОВ” диэн интеллектуальнай оонньуу, “Знамя Победы” өрөспүүбүлукэтээҕи эстафетаны көрсүү, “Горячий снег” диэн байыаннай-спортивнай оонньууну тэрийии, “Скамейка для ветеранов” диэн бырайыагынан музейга уонна монумеҥҥа скамейкалар туруулара о.д.а. Оксуола иһинэн үгүс араас сыаллаах акциялар бардылар: “Штандарт фронтов ВОВ”, “Георгиевская лента”, “Помним, чтим, гордимся”, ону таһынан «Стена памяти» диэн сайт оҥоһуута, «Учителя ВОВ», «Эхо Победы» диэн Улуу Кыайыыга, кинилэр кыттыылаахтарыгар анаммыт кинигэлэр таҕыстылар. Кылаастар бэтэрээннэри чиэстээтилэр, араас хабааннаах көрсүһүүлэри, кылаас чаастарын ыыттылар, Кыайыы 70 сылыгар анаммыт республиканскай, региональнай, улуустааҕы, муниципальнай хабааннаах НПК-ларга, куонкурустарга, фестивалларга, күрэхтэргэ кыттан миэстэлэстилэр. Аллараа – Бэстээххэ буолбут Кыайыы улуустааҕы параадыгар 4в кылаас кэлэктиибэ барабааҥҥа оонньоон доҕуһуоллаппыта, чиэстээһини киэргэппитэ, 6а кылаас кэлэктиибэ улуустааҕы «Класс года» бырайыак кыайыылаахтара буолан, паракка үөрүүлээх быһыыга-майгыга хаамар чиэскэ тиксибиттэрэ.

Бу ыытыллыбыт тэрээһиннэр түмүктэринэн оҕолор үгүс элбэҕи биллилэр, чинчийдилэр, үөрэттилэр, сэрии диэн норуот алдьархайа буоларын, инники дьылҕата быһаарыллар иэдээнин суола буоларын, элбэх киһи дьылҕата бу кыайыыны ситиспитин, бэтэрээннэргэ, кыайыыны уһансыбыттарга үйэлэргэ дириҥ махтал тиэрдэллэрин чопчу өйдөөтүлэр.

Сэрии аны буолума, хаан тохтуутун ыытыма.

              

Просмотров: 440 | Добавил: beteamfedor | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]