Главная » 2017 » Август » 27 » В.П. Ларионов аатынан Майа орто оскуолатын сайыҥҥы лааҕырдара
11:21
В.П. Ларионов аатынан Майа орто оскуолатын сайыҥҥы лааҕырдара

Ларионов аатынан оскуола оҕолоро сайыммытын туһалаахтык атаарабыт

 В.П. Ларионов аатынан Майа орто оскуолата сайыҥҥы сынньалаҥ кэмигэр үөрэнээччилэри үлэҕэ үөрэтэр, доруобуйаларын чэбдигирдэр, билиилэрин-көрүүлэрин хаҥатар сыаллаах уопсайа 380 оҕону хабан иккилии-үстүү сезоннаах биэс лааҕыры үлэлэттэ: Хаптаҕай нэһилиэгэр базаланар «Юность» үлэ-сынньалаҥ лааҕыра (салайааччылар, иитээччилэр – Харлампьев Г.А, Самсонов М.А, Черкашин К.В., Петухова А.А., Варламова А.П., Жиркова В.В., Харитонова П.А., Илларионова Н.Г., Давыдова О.Е.). Ороссолуодаҕа – доруобуйаны бөҕөргөтөр «Дружба» (Борисов Н.Л., Куприянов С.И., Брызгалов Д.Н., Бродников А.А.,Сыдыкбеков Т.А., Петрова Т.В., Андреева И.Н., Семенова П.В., Кривошапкина К.Т., Расторгуева М.Э., Семенова М.Н) Дойду нэһилиэгэр доруобуйаны бөҕөргөтөр, үөрэтэр хайысхалаах «Дойду» (Семенов Е.Е., Шарина Е.Г.) оскуола баазатыгар урбаан эйгэтигэр билиини хаҥатар, сатабылы иҥэрэр «Бизинк» (Сивцева М.В,Рязанская А.Ф) маҥнайгы кылаас үөрэнээччилэригэр оскуолаҕа бэлэмниир «Первоклассник» (Ильина Е.Н., афанасьева Н.Н., Филиппова А.А., Борисова А.А.). Күннэтэ лааҕырга сылдьар үөрэнээччилэргэ аналлаах араас хабааннаах тэрээһиннэр, дьарыктар күргүөмнээхтик ыытылыннылар. Ол курдук, Дойду лааҕырыгар сынньаммыт 10 «а» кылаас үөрэнээччилэрэ (кыл. сал. Шарина Е.Г.) биир кэлим эксээмэҥҥэ бэлэмнэннилэр, профориентационнай көрсүһүүлэргэ сырыттылар, ХИФУ устудьуоннарын кытта веревочнай курстарга дьарыктаннылар, «Дружба» лааҕырга 4 «а» кылаас үөрэнээччилэрэ (кыл салайааччыта Расторгуева М.Э) кыһыҥҥы кэмҥэ ансаамбылынан күрэхтэргэ кытталларыгар анаан бастыҥа тиктилэр, куолаттара уһанарга үөрэннилэр; 5 «б» кылаастар (сал. Кривошапкина К.Т) английскай тылы үөрэттилэр, айылҕаҕа тахсаннар кыһыҥҥы кэмҥэ уруокка туттуллар физкульт-мүнүүтэлэргэ аналлаах килииптэри уһуллулар; 6 кылаас үөрэнээччилэрэ (сал. Андреева И.Н.) Саха сирин бэлиэ сирдэрин үөрэтэр сыаллаах «Төрөөбүт дойдум» бырайыак чэрчитинэн, «Күрүлүүр», «Булуус» кэрэ-бэлиэ сирдэригэр сырыттылар. Маныаха, хонуктаах лааҕырдарга сылдьыбыт үөрэнээччилэр бука бары оскуола фитобарыгар анаан эмтээх оту хомуйууннаан дьарыктаннылар. Ол курдук, боҕуруоскай, кучу оттору хомуйан, куурдан-хатаран кыстыкка бэлэмнээтилэр.

Лааҕыр күннээҕи олоҕун илэ харахпытынан көрөөрү «Юность» лааҕыр иккис сезонугар ыалдьыттаатыбыт. Улаҕата көстүбэт киэҥ сыһыылаах, хатыҥ-чараҥ алардаах алааска баазаламмыт лааҕырга 9 «а» уонна 9 «в» кылаастан уопсайа 25 оҕо кэлбит (сал. Жиркова В.В., Харитонова П.А). Лааҕыр икки киэҥ-куоҥ, сырдык-ыраас хостордоох икки олорор куорпустаах уонна туспа турар, минньигэс астаах-үөллээх остолобуойдаах. Быйыл лааҕыр өрөмүөнүгэр министиэристибэттэн харчы көрүллэн, оскуола выпускника, попечитэлэ Константин Попов үрдүк таһымнаах капитальнай өрөмүөн ыыппыт. Ол курдук, остолобуой үрдэ, муостата, эркинэ саҥардыллыбыт, түнннүк уларыйбыт, куорпустар сылытыллар гына турба тардыллан оһохтоммут. Дьэ онон тып-тап тутуллан саҥардыллыбыт лааҕырга оҕолор оскуола мүөттээх ыҥырыатын, хортуоппуй бааһыналарын, оҕуруоту, кууруссалары уонна куруолуктары көрүүнэн-истиинэн дьарыктаналлар эбит. Күҥҥэ биэстэ битэмииннээхтик, минньигэстик аһыыллар. Сынньалаҥнарыгар араас көрдөөх оонньуулары тэрийэн ыыталлар, күрэхтэһэллэр. Лааҕырдарын туһунан оҕолор санааларын бу курдук үллэстэллэр:

Даяна Игнатьева, 8 «а» кылаас үөрэнээччитэ:

  • Лааҕырбытын олус сөбүлээтибит. Оҕолор бука бары иллээхтик-эйэлээхтик үлэлиибит. Күннэтэ редискэҕэ, моркуопка, сүбүөкүлэҕэ уу кутабыт, сыыс оту ыраастыыбыт, куруолуктарбытын, кууруссаларбытын аһатабыт. Маны сэргэ 10 оҕо хамнастанан икки күн алта бааһына хортуоппуй сыыһын ыраастаатыбыт, тээпкэлээтибит уонна уу куттубут. Билиҥҥи кэм оҕолоро харчы сыралаах үлэттэн кэлэрин билиэхтээхпит. Онон оҕолор бастакы хамнаспытын ылан олус үөрдүбүт.

Яша Скрябин 9 «в» кылаас үөрэнээччитэ:

  • Биһиги оскуолабыт мүөттээх ыҥырыаны иитиинэн дьарыктанар. Сайыҥҥы кэмҥэ пасекабытын бу «Юность» лааҕырга таһаарабыт. Ыҥырыаны лааҕырга көрүүгэ-истиигэ биһигини учууталбыт Валентина Васильевна үөрэтэр. Оҕолор ыҥырыаларга анал таҥас кэтэн баран биирдэ чугаһыыбыт. Быйылгы лааҕырга ыҥырыаны кэтээн көрүүгэ чинчийэр үлэни ыыта сылдьабыт. Кыһыҥҥы өттүгэр дакылаат буолуохтаах. Бу сезоҥҥа кэтээн көрбүппүтүнэн, биир семья матката суох этэ. Ол иһин атын семьяттан матка уган боруобалаатыбыт. Бу матка 10 хонук иһигэр олохсуйуохтаах. Мин саамай интэриэһиргээбитим диэн – ыҥырыалар нектар хомуйа уйаларыттан тахсан 36 көтөллөр уонна бүтэһик сырыыларын кэнниттэн өлөн хаалаллар. Ол оннугар саҥа ыҥырыалар тахсан иһэллэр. Ону эмиэ кэтээн көрдүбүт, олус интэриэһинэй. Оскуолабыт мүөттээх ыҥырыа иитэриттэн олус үөрэбит уонна киэн туттабыт.

Варя Захарова, 9 кылаас үөрэнээччитэ:

- Мин санаабар самаан сайын куйаас күннэрин лааҕырга атаарар олус туһалаах. Доҕотторгун кытта сайыҥҥы лааҕырга сылдьыбыккын кэнники, улаатан баран ахтарга-саныырга олус үчүгэй буолуо дии! Манна биһиги хас биирдии күммүт хатыламматтык, интэриэһинэйдик ааһар. Быйыл өрөспүүбүлүкэҕэ оҕо көҕүлээһинин сыла буоларынан тэрээһиннэрбитин барытын оҕолор бэйэбит толкуйдаатыбыт. Оскуолабыт бизнес-инкубатор буоларынан, лааҕырга оҕолор «Аукцион» диэн оонньуу ыыттыбыт. Онно ким тугу сатыырынан үлэлээммит карточка ыллыбыт. Онон аукциоҥҥа кыттан ким төһө карточкалааҕынан минньигэскэ тигистибит. Маны сэргэ этэрээттэрринэн арахсан күрэхтэстибит, биллиилээх дьону үтүктэн кэнсиэр тэрийдибит, киинэ уһуллубут.

Дьэ бу курдук, В.П. Ларионов аатынан Майа орто оскуолатын үөрэнээччилэрэ сайыҥҥы сынньалаҥнарын туһалаахтык атаардылар, элбэх саҥаны биллилэр-көрдүлэр.

Изабелла Романова, Лена Сидорова «Мэҥэбил» эдкорпост.

 

Просмотров: 70 | Добавил: mayaschool | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]