Главная » 2017 » Август » 27 » В.П. Ларионов аатынан Майа орто оскуолатын эр дьонун ансаамбыла
11:07
В.П. Ларионов аатынан Майа орто оскуолатын эр дьонун ансаамбыла

Мындыр өйдөөх өбүгэлэрбит былыр-былыргыттан уол оҕону иитиигэ, эрийэн-мускуйан эр бэрдэ гына уһааран, хатаран таһаарыыга улахан болҕомтону уураллара. Саха эр киһитэ сатаабата диэн суох...Тыйыс услуобуйалаах хоту дойдубутугар сыспай сиэллээҕи мииннэ да - булчут бэрдэ, түһүлгэҕэ киирдэр эрэ – быһый бастыҥа, оһоҕун иннигэр олордо да – олоҥхоһут мааныта буола түһэр уратылаах. Устар ууну сомоҕолуур уус-уран тыллаах төрүттэрбит кыһыҥҥы уһун киэһэлэргэ балаҕаны төгүрүччү олорон олоҥхону, норуот ырыатын бэркэ кэрэхсээн, сөбүлээн истэллэрэ. Аны туран, олоҥхоһут, түһүлгэни түмэр ырыаһыт үксүн эр киһи буолара. Ол иһин чөллөркөй куоластаах уол оҕону улааттааҕына ырыаһыт дуу олоҥхоһут ду буолсу диэн билгэлээн бэркэ харыстаан этэллэрэ.

В. П. Ларионов аатынан Майа орто оскуолатыгар уол оҕону төрөөбүт дойдутугар, норуотугар туһалаах, бары өттүнэн ситиһиилээх эр киһи гына иитиигэ ситимнээх үлэ ыытыллар. Онуоха, алын кылаастан саҕалаан оскуолаҕа үлэлиир эр дьонугар тиийэ – бука барыларын түмэр «Уолаттар ансаамбыллара» төрдүс сылын айымньылаахтык үлэлиир. Салайааччы – музыка учуутала, ырыа куруһуогун салайааччыта Светлана Аркадьевна Борисова. Өлүөнэ эбэ очуостарыныы чиккэччи кэчигирэспит чиргэл быһыылаах-таһаалаах, тирииттэн тигиллибит кэрэхсэбиллээх көстүүмнээх, истээччини биһирэтэр эрчимнээх куоластаах ансаамбыл уолаттара саха бастыҥ ырыаларын ыллаан дуораһытталлара көрөргө-истэргэ олус кэрэхсэбиллээх – «Кырдьыга да, сахалар инники күөҥҥэ сылдьар бэртээхэй эр дьонноохпут, үүнэн эрэр кэнчээри уолаттардаахпыт» диэн киһи киэн тутта, астына саныыр... Ансаамбыл түөрт сыл устата таһаарыылаахтык үлэлээн бүгүҥҥү күҥҥэ үрдүк таһымнаах кэккэ ситиһиилэрдээх. Уолаттар нэһилиэк, улуус, республика ыытар тэрээһиннэригэр, кэнсиэрдэригэр көхтөөхтүк кытталлар, дьон-сэргэ биһирээн ыҥыырыыга сылдьар мааны ыалдьыт буоллулар.

 

Ансаамбыл айар үлэтин туһунан салайааччы Светлана Аркадьевнаны кытта сэһэргэстибит:

Ансаамбылы хайдах тэрийбиккиний?

- 2013 сыллаахха В.П. Ларионов аатынан Майа орто оскуолатыгар үлэлии кэлээт, улахан кылаас уолаттарын түмэн ансаамбыл тэрийбитим. Ол саҕана ыллаан саҕалаабыт уолаттар билигин номнуо 11 кылаас буолан оскуоланы бүтэрээри сылдьаллар. Ол иһин быйылгы үөрэх сылыттан «Туйах хатарааччылары» таһаарар санааттан быйылгы 5 «б» кылаас уолаттарын (Варламова А.П) алын бөлөх оҥорон дьарыктыы сылдьабын. Оскуолабыт 800-чэкэ үөрэнээччилээх буолан, элбэх оҕону ырыа кэрэ эйгэтигэр уһуйар санааттан, маны сэргэ 3 – 11 кылааска диэри Хоровой кэллэктиип, «Сардаҥалар» араас саастаах оҕолор холбоһук ансаамбыллара, «Үрүйэчээн» 3 «б» кылаас ырыа ансаамбылын салайан үлэлии-хамсыы сылдьабын. Ону сэргэ уолаттар ансаамбылларыгар оскуола эдэр эр дьон учууталлар киирдилэр.

Уол оҕо ансаамбылын тэрийии, үлэлэтии туох уратылааҕый?

- Уол оҕону ырыанан иитии олус дириҥ суолталаах. Ансаамбылга ыллыы үөрэммит уол оҕо кэллэктиипкэ үлэлии үөрэнэр, түмсүүлээх, тулуурдаах, дьулуурдаах майгыланар. Уонна, туох ханнык иннинэ, ханнык баҕарар эйгэҕэ үлэлээтэр, айымньылаах үлэһит буолар. Уопсайынан, тус бэйэм уол оҕо ыллыырын ордук сэҥээрэбин.

 

 

Репертуаргытын хайдах талаҕыт?

- Уолаттарым төрөөбүт дойдуларыгар бэриниилээх ыччат буола үүннүннэр диэн төрөөбүт норуот, тыл, саха эр киһитин туһунан ис хоһоонноох, куоластарыгар барсар ырыалары ыллатарга дьулуһабын. Бэйэлэрэ да норуоту түмэр ис хоһоонноох ырыалары ыллыылларын сөбүлүүллэр. Репертуары хаҥатыыга бэйэлэрэ эмиэ этиилэрдээхтэр, көмөлөһөллөр. Ол курдук, Аскалон Павлов «Эр хоһуун буол», Аркадий Алексеев «Аан дойду ыччатын сүрэҕэ», И. Васильев «Төрөөбүт дойду», А. Бурнашов «Доҕоттор» уо.д.а.

Көстүүмҥүт быһыытын-таһаатын ким айарый, тигэрий?

- Көстүүммүтүн оскуолабытыгар үлэлиир муода устуудьуйатын салайааччыта Мария Соловьа эскизтиир, тигэр. Быйыл хоҥор өҥнөөх тирииттэн сахалыы оһуордаах-мандардаах сэлиэччиктэри, төбөҕө иилинэр харысхаллары, этэрбэстэри тиктибит. Таҥаспын-саппыт үбүлээһинин оскуола уйунар. Онон, дириэктэрбитигэр Светлана Кимовна Игнатьеваҕа махталбыт муҥура суох.

Ситиһиилэргит туһунан сырдыаххыт дуо?

- Бу түөрт сыл устата араас хабааннаах күрэхтэргэ кыттаммыт ситиһиибит элбэх диэххэ син. Онтон саамай сүрүнүн эттэххэ, Санкт-Петербург куоракка ыытыллыбыт «Салют талантов» норуоттар икки ардыларынааҕы ырыа күрэҕэр икки төгүл Лауреат, «Бриллиантовые нотки» норуоттар икки ардыларынааҕы ырыа фестивалыгар - Лауреат уонна республикатааҕы, улуустааҕы күрэхтэргэ эмиэ кыайыылаах буолааччыбыт.

Альберт Харитонов, XI кылаас үөрэнээччитэ:

- Мин бу ансаамбылга VIII кылаастан сылдьабын. Улуус, республика, Дойду, норуоттар икки ардыларынааҕы күрэхтэргэ ситиһиилээхтик кыттан элбэххэ үөрэннибит, сири-дойдуну көрдүбүт, оҕолору кытта билсэн элбэх доҕоттордонубут. Уонна саамай сүрүнэ ыллыы үөрэннэхпит дии! Нэдиэлэҕэ үстэ дьарыктанабыт. Учууталбыт сөпкө тыынарга, нуоталары араарарга, куолаһынан арахсарга үөрэттэ. Онон, инникитин устудьуоннуу да бардахпытына, үлэһит да буоллахпытына ырыабыт, музыкабыт өрүү күүс-көмө, ханнык баҕар түгэҥҥэ бигэ тирэх буолуо дии саныыбын. Светлана Аркадьевнаҕа бары кыһамньытын, сүбэтин-аматын иһин ансаамбыл аатыттан барҕа махталбын тиэрдэбин!

Изабелла Романова

Просмотров: 60 | Добавил: mayaschool | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]