Быйылгы үөрэх сылыгар В.П. Ларионов аатынан Майа орто оскуолатын 49 үөрэнээччи ситиһиилээхтик бүтэрэн үөрэх-билии куорсунун анньынан олох киэҥ аартыгар үктэннэ. Кинилэр кэккэлэригэр киэҥ тутта ааттыыбыт – ​ оскуолабытын киэҥ эйгэҕэ ааттаппыт бастыҥ эдэр чинчийээччилэри, олимпиада кыайыылаахтарын, эрчимнээх спортсменнары, дьүрүһүтэр хомусчуттары, талааннаах ырыаһыттары, үҥкүүһүттэри, хомоҕой хоһоонньуттары. Үөрэнээччилэри оскуола сылларыгар бигэ тирэх, бастыҥ сүбэһит буолан арыаллаабыт кылаас салайааччыларынан Василиса Кузьминична Никифорова уонна Анна Александровна Петухова буолаллар.

Анна Александовна салайааччылаах 11 «а» кылаас үөрэнээччилэрэ «Үтүөнү оҥор» диэн аһымал, итиэннэ айылҕаны, тулалыыр эйгэни харыстыыр сыаллаах бырайыагы 6 сыл устата ситиһиилээхтик үлэлэтэн, бар дьон махталын ыллылар, үтүө түмүктээх үгүс үлэни оҥордулар. Оскуола бары тэрэһиннэрин хомус алыптаах, дьүрүскэн тыаһынан киэргэппит, Василиса Кузьминична салайааччылаах 11 «б» ​ кылаас кэлэктиибэ хомуска маастарыстыба таһымыгар тиийэ уһуйуллан, саха төрүт култуурата норуоттар икки ардыларынааҕы таһымҥа тахсарыгар тус кылааттарын киллэрдилэр. Онон, бары өттүнэн икки чаҕылхай кылаас оскуола иэниттэн билии бигэ тирэҕин ылан олох суолугар туруннулар. Кинилэр иннилэригэр устудьуон дьоллоох сыллара, эдэр саас эрчимнээх күннэрэ дьэрэкээн сибэккилээх хонуу кэриэтэ тэлгэнэн ыҥыра, угуйа турдаҕа...

Үөрэнээччилэргэ орто уопсай үөрэхтээһин аттестатын туттары үөрүүлээх тэрээһинэ бэс ыйыгар ыытылынна. Бу күн бастыҥнар ааттаннылар, анал стипедиялар ​ туттарылыннылар. Быйыл оскуоланы 6 үөрэнээччи кыһыл көмүс мэтээлинэн бүтэрдэ: Абрамов Женя, Баишева Маша, Старостин Алеша, Сергучева Аня, Степанова Женя, Петрова Настя!

Үөрэнээччилэр нуучча тылын биридимиэтигэр булгуччулаах ​ БКЭ, итиэннэ ханнык үөрэххэ туттарсалларынан сүрүннээн иккилии талбыт биридимиэттэригэр БКЭ тургутугун аастылар. Нуучча тылын БКЭ Сергучева Аня – 96 б, Абрамов Женя 94 б, Попов Герман – 78 б туттардылар.
Алеша Старостин уонна Женя Абрамов аһаҕас регионнааҕы үрдүк үөрэх кыһаларын икки ардыларыгар ыытыллыбыт олимпиадаларга, Игнатьев Павел – «Мин идэм – IT» IV Республикатааҕы күрэххэ ситиһиилээхтик кыттан Москва, Санкт-Петербург, Казань, Томскай, Новосибирскай, Красноярскаай үрдүк үөрэх кыһаларыгар босхо үөрэнэргэ целевой миэстэ ылбыттара.
Бука бары выпускниктарбытын орто уопсай үөрэхтээһин аттестатын ылбыккытынан итиитик-истиҥник эҕэрдэлиибит.